काठमाडौं : एमाले-माओवादी केन्द्रबीचको एकता प्रक्रिया चाँडो नटुंगिदा कार्यकर्तामा निराशा बढ्न थालेको छ । वाम गठबन्धन घोषणा भएकै दिन एमाले-माओवादीले चुनाव लगत्तै पार्टी एक हुने घोषणा गरेका थिए ।
दुवै पार्टीका अध्यक्षहरू एकता प्रक्रियालाई टुंगोमा पुर्याउन घनिभूत वार्तामा बसेकाले प्रक्रिया चाँडो निष्कर्षमा पुग्ने दाबी एमालेका नेताहरूले गरेका छन् । तर माओवादी पक्ष भने प्रधानमन्त्री एवं एमाले अध्यक्षका कारण एकता प्रक्रियामा ढिलाइ भइरहेको बताएको छ ।
यी दुई पार्टीबीचको एकता एकीकृत पार्टीको संगठनात्मक हिस्सेदारी, चुनाव चिह्न, माओवादी जनयुद्धको स्वीकारोक्तिलगायतमा अल्झेको छ । ओली सरकारका केही समययताका निर्णय तथा व्यवहारका कारण समेत गाह्रो परेको दुःखेसो माओवादी पक्षको छ ।
दुई दिने नेपाल भ्रमणमा आएका भारतीय प्रधानमन्त्री नरेन्द्र मोदीको सम्मानका लागि ओली र माओवादी केन्द्रका अध्यक्ष पुष्पकमल दाहालबीच कुनै वार्ता नभए पनि पार्टी एकताका विषयमा दुई नेताबीच कुनै न कुनै रुपमा सम्पर्क भइरहेको दाबी एमाले पक्षको छ ।
संगठनात्मक हिस्सेदारी कसरी मिलाउने र कार्यदलले बुझाएको प्रतिवेदनका आधारमा एकीकृत पार्टीको केन्द्रीय समितिको आकार कस्तो बनाउने भन्ने विषय नै एकताका लागि समस्या बनिरहेको छ ।
दाहालले एकीकृत पार्टीमा आफ्नो स्थान कसरी सुरक्षित गराउने र भावी नेतृत्व कसरी हुत्याउने भन्ने रणनीति नछाड्दा एकतामा ढिलाइ भइरहेको एमाले स्रोतको दाबी छ ।
एकता प्रक्रिया पूर्वनिर्धारित समय वैशाख ९ मा नटुंगिएपछि वैशाख १८ एवं २२ गतेका लागि सारिएको चर्चा चलेको थियो । पछिल्लो समय भारतीय प्रधानमन्त्री नरेन्द्र मोदीको नेपाल भ्रमण लगत्तै एकता प्रक्रिया टुंग्याउने नेताहरूले बताउन छाडेका छैनन् ।
एकता संयोजन समितिका सदस्य सुवास नेम्वाङले एमाले-माओवादीबीच पार्टी एकता चाँडो टुंगिने विश्वास व्यक्त गरे ।
उनले आइतबार अन्नपूर्णसँग भने, ‘ओली र दाहालबीच वन् टु वन् वार्ता भइरहेकोले पार्टी एकता चाँडो हुन्छ ।’
अन्तरिम विधान कार्यदलले २९९ सदस्यीय केन्द्रीय समिति बनाउने प्रस्ताव एकता संयोजन समितिलाई गरेको थियो । तर केन्द्रीय समितिमा समेटिने दुवै पक्षका नेताको समायोजनमा कुरा नमिल्दा आकार बढाउने गरी पछिल्लो समयमा नेताद्वयबीच छलफल केन्द्रित छ ।
नेताहरूका बीचको छलफलमा ३५१ वा ३९९ मध्ये एकमा समझदारी बनाउनेमा सहमतिको प्रयास अझैजारी छ । माओवादीले केन्द्रीय समितिमा सम्मानजनक, समानता र न्यायोचित एकताको माग गरेपछि संगठनात्मक हिस्सेदारी मिलाउन ओली-दाहाललाई सकस भइरहेको छ ।
‘अहिले चलिरहेका दुई अध्यक्षको छलफल एकले-अर्काे पक्षलाई कतिसम्म गलाउन सकिन्छ भन्नेतर्फ नै केन्द्रित छ, तर एकताबाट टाढा दुवै अध्यक्ष छैनन्’, एमालेका एक नेताले भने ।
माओवादी नेता टोपबहादुर रायमाझीले वैचारिक रुपमै दुई पार्टीबीचको राजनीति मिलाउन अझै समय लाग्ने बताउँछन् ।
एकताका लागि आवश्यक पर्ने सोच र कार्यान्वयनले कार्य गर्न नसकेको दुःखेसो उनले पोखे ।
माओवादी नेता प्रभु साहले एमाले अध्यक्ष एवं प्रधानमन्त्री ओलीको कार्यशैली र क्रियाकलापकै कारण एकता प्रक्रियामा ढिलाइ भएको बताए । उनले भने, ‘सरकारका कतिपय महत्वपूर्ण नीति, निर्णय र कार्यशैलीकै कारण एकता हुन नसकेको पर्याप्त उदाहरण छन् ।’
प्रतिक्रिया दिनुहोस !
