'सरकारमा धमिरा लाग्न थाल्यो, ओलीको राष्ट्रवाद चाकडीमा परिणत'
जनकपुरधाम: नेपाली कांग्रेसका उपसभापति विमलेन्द्र निधिले वर्तमान सरकारमा आन्तरिक धमिरा लाग्न सुरू भइसकेको बताएका छन् ।
कांग्रेस धनुषाको १३ औँ अधिवेशनको सोमबार यहाँ उद्घाटन गर्दै उनले भने, 'सरकारमाथि भरोसा गर्न सक्ने सङ्केत देखिएको छैन ।'
उपसभापति निधिले सरकारको क्रियाकलापले संघीय संरचना र संविधानमाथि खतरा उत्पन्न हुन थालेको उल्लेख गर्दै एमाले अध्यक्ष केपी शर्मा ओली सरकारले देशभक्ति र राष्ट्रियता चाकडीमा परिणत गरिसकेको आरोप लगाए ।
कांग्रेस लोकतन्त्रको सुरक्षाको गार्ड भएको चर्चा गर्दै उनले लोकतन्त्रको रक्षा सन्दर्भमा कतिपय अवस्थामा हार भए पनि लोकतान्त्रिक प्रणालीको रक्षा गर्न सफल भएकाले निराश नभई संगठित हुनु जरूरी भएको बताए ।
उपसभापति निधिले प्रदेश नं २ को सरकारले भारतीय प्रधानमन्त्री नरेन्द्र मोदीको नागरिक अभिनन्दन समारोहमा आन्तरिक समस्या प्रस्तुत गरेर आफ्नो कमजोरी प्रदर्शन गरेको बताउँदै संविधान संशोधनको कुरा मोदीलाई होइन, प्रधानमन्त्री केपी शर्मा ओलीसमक्ष राख्नुपर्ने बताए ।
कार्यक्रममा कांग्रेस केन्द्रीय सदस्यहरू आनन्दप्रसाद ढुंगाना र महेन्द्र यादव, पूर्वमन्त्री रामकृष्ण यादव, सांसदद्वय स्मृतिनारायण चौधरी र मीनाक्षी झालगायतले अन्तरघात, स्वेच्छाचारिता, गुट, संकीर्णता, विभेद र अनुशासनहीनताले कार्यकर्तामा चिन्ता र निराशा बढ्दै गएको बताए ।
प्रतिक्रिया दिनुहोस !
