विहे गर्न जन्ती लिएर भारत पुगेका बेहुलालार्इ कुटपिट गरी बन्धक बनाइयो
जेठ १, २०७५ मंगलबार १०:३७:०
सिरहा : भारतीय प्रधानमन्त्री नरेन्द्र मोदी भर्खर नेपाल भ्रमणमा आएका बेला नेपाल-भारतबीच रोटी बेटीको सम्बन्ध रहेको बताए । नेपालका प्रधामन्त्री केपी ओलीदेखि लिएर प्रदेश २ का मुख्यमन्त्री लालबाबु राउतले पनि मोदीको भ्रमणले दुई देश विचको सम्बन्ध प्रगाढ भएको दावी गरे । तर सिरहाबाट विहे गर्न बाजागाजा र जन्तीसहित पुगेका बेहुलालाई भारत सितामढीमा बेहुली पक्षले तीन दिन बन्धक बनाएको घटना सार्वजनिक भएको छ ।
लहान नगरपालिका ४ का कैलास साहका २५ बर्षिय छोरा राजाबाबु राह आईतवार जन्तीसहित दर्जनौं सवारी साधन र बाजागाजा लिएर विहे गर्न सितामढी पुगेका थिए । मिथिला संस्कृति अनुसार गरिने सोमबर पनि सौहादपूर्ण तरिकाले सम्पन्न भयो । जन्तीहरु खाजा खाए । खाना खुवाउने तयारी भइरहेका बेला जब बेहुलाले सिन्दुरदान गर्न बेहुलीको आँगन पुग्यो, एकाएक हल्ला हुन थाल्यो । जन्तीहरु भागाभाग भए । खाना पनि खान पाएनन् । बेहुली पक्षका व्यक्तिहरुले बेहुला, उनका बुवा, आफ्न्तजन र दर्जनौं जन्तीलाई नियन्त्रणमा लिएर कुटपिट तथा दुर्व्यवहार गरे ।
जन्ती पुगेका प्रदिप गुप्ता भन्छन्, ‘जब होहल्ला मच्यो । अनी हामी भाग्यौं । कैयौं जन्तीलाई बेहुलीका आफ्न्त र गाउँलेले नियन्त्रणमा लिएर कुटपिट गरेका छन् ।’ सोमबर शान्तिपूर्वक सम्पन्न भएर बेहुली सिन्दुरदान गर्न पुगेका बेला विवाद भएको उनले बताए । उनले बेहुला र उनका आफ्न्त समेत कुटिएको उनले भने । थपे, ‘होहल्ला सुरु हुने वित्तिमै म भागेकोले विवाद किन भयो भन्ने कुरा मलाई थाहा भएन ।’
यता, बेहुलाका बुवा कैलासका अनुसार बेहुला मदिरा खाने मान्छे हो भन्दै बेहुलीका आफन्तले झुठो आरोप लगाएर एकाएक कुटपिटमा उत्रे । छोरा (बेहुला), आफ्न्त र आफूलाई समेत कुटपिट तथा दुर्व्यवहार गर्न थालेको उनले दुःखेसो पोखेका छन् । उनले बेहुलीका बुवाले बन्धक बनाएर जर्वजस्ती ६ लाख भारतीय रुपैया असुलेको गुनासो गरेका छन् । बेहुलीका बुवाले अब छोरीको विहे नगर्ने भन्दै सुरुमा १२ लाख रुपैया भारु मागेपनि पछि ६ लाख भारु लिएर तीन दिनपछि छाडेको बताए ।
उनले छोरा (बेहुला)सँग भएको नगद १ लाख, एकभरी सुनको गहना, करिब ५० हजार रुपैया बराबरको लत्ताकपडा र सोमबरमा उपहार पाएका चार वटा सुनको अँगुठी समेत बेहुलीका आफ्न्तले लुटेको पीडा सुनाए । ‘खर्च बापत बेहुलीका बुवाले साढे ४ लाख रुपैयाँ दिएको थियो’, भने, ‘सहयोग गर्ने कोही भएन । प्रहरीले पनि उनीहरुकै पक्षमा बोल्यो । हामीलाई सबैले हेप्ने काम मात्र गर्यो ।’ नेपाली हो भन्दै सबैले हेप्ने काम मात्र गर्यो कोही सहयोग नगरेपछि विहे रद्द गर्न सहमत भए र रित्तै फिर्ता भएँ- उनले थपे ।
सितामढीका अञ्जनी प्रसाद भन्ने बासु साहका छोरीसँग विहेको छिनोफानो अर्थात् टिकाटालो भएको करिब महिना दिन भएको थियो । बेहुलाका बुवा प्रश्न गर्छन्, ‘मेरा छोरा आजसम्म मदिरा खाएको छैन् । मानौं यदि मदिरा नै खाएछन् भने टिकाटालोको एक महिनापछि जन्ती लिएर विहे गर्न जाँदा सोमबर हुँदासम्म उनीहरु अनभिज्ञ कसरी थिए ? सोमबर हुँदासम्म थाहा नपाएको र भइसकेको घण्टा नवित्दै मदिरा खाने गरेको कुरा कसरी पत्ता लाग्यो ? ’ मेरो परिवारलाई बदनाम र कलंकित पार्न यसरी षड्यन्त्रमूलक तरिकाले फसाएर विहे नगरेको उनले पीडा पोखे ।
यता, ईलाका प्रहरी कार्यालय लहानका प्रहरी नायब उपरीक्षक गणेश चन्दले विहे गर्न भारत पुगेका बेहुला र जन्तीलाई बन्धक बनाएर लुटपाट गर्नका साथै रकम समेत जर्वजस्ती असुलेको विषयमा केहि थाहा नभएको जानकारी दिए । उनले भने, ‘अहिलेसम्म पीडितले उजुरी गरेका छैन् । तर किन यस्तो भयो भन्ने विषयमा पत्ता लगाउछौं ।’
प्रतिक्रिया दिनुहोस !
