वाराणसी : भारतको उत्तर प्रदेशस्थित वाराणसीको कैन्ट क्षेत्रमा निर्माणाधीन पुल भत्कँदा १६ जनाको मृत्यु भएको छ । निर्माणाधीन आकाशे बाटोको एक भाग एक्कासि खसेको थियो ।
५० भन्दा बढी व्यक्ति आकाशे बाटोको भग्नावशेषमा पुरिएको प्रहरीको भनाइ छ । निर्माणाधीन आकाशे बाटोका दुईवटा पिलर भत्किँदा रोडा र सिमेन्टले बनेको विशाल संरचना सडकमा गुडिरहेका गाडी र मानिसमाथि खस्दा मानवीय क्षति हुनपुगेको बताइएको छ । उत्तर प्रदेशका मुख्यमन्त्री योगी आदित्यनाथले दुर्घटनाप्रति दुःख प्रकट गरेका छन् ।
उनले घटनास्थलमा तत्काल पुगेर उद्धारमा जुट्न आदेश दिएका छन् । यस क्षेत्रमा लामो समयदेखि निर्माण कार्य भइरहेको थियो । मंगलवार साँझ एक्कासि आकाशे बाटोको एक भाग तल खसेको थियो । यसबाट तल सडकमा रहेका गाडी र मानिस किचिएका थिए । मृतकको संख्या अझै बढ्न सक्ने अनुमान गरिएको छ । पुरिएका कार, टेम्पो लगायतका कैयौं सवारी साधनमा रहेका व्यक्तिका बारेमा जानकारी आउन समय लाग्ने बताइएको छ ।
कैन्ट रेलवे स्टेशन नजिकै भएको उक्त दुर्घटनामा तल गुडिरहेका गाडी पूर्णरूपमा क्षतिग्रस्त भएका छन् । त्यहाँ पुरिएका व्यक्तिको उद्धारमा सेना, सशस्त्रबल खटाइएको छ । उत्तर प्रदेशका प्रहरी डीआईजी ओपी सिंहले उद्धारकर्मीलाई तत्काल खटाइएको र उद्धारकार्य जारी रहेको जानकारी दिएका छन् ।
मुख्यमन्त्री योगी आदित्यनाथले दुर्घटनाप्रति दुःख प्रकट गर्दै यसका बारेमा विस्तृत जानकारी लिएका छन् । उनले जिल्ला प्रशासनलाई उद्धारकार्यमा कुनै कमी नहुन आदेश दिएका छन् । राज्य सरकारले मृतकका आफन्तलाई पाँच पाँच लाख भारतीय रुपैयाँ क्षतिपूर्ति दिने घोषणा गरेको छ । गम्भीर घाइतेलाई दुई दुई लाख रुपैयाँ दिइनेछ । मुख्यमन्त्री योगीले दुर्घटना अनुसन्धान गर्न छानबिन समिति गठन गरेका छन् । उनले ४८ घण्टाभित्र प्रतिवेदन बुझाउन छानबिन समितिलाई आदेश दिइएको छ ।
भारतीय प्रधानमन्त्री नरेन्द्र मोदीले पनि दुर्घटनाप्रति दुःख व्यक्त गरेका छन् । उनले यस विषयमा उत्तर प्रदेशका मुख्यमन्त्रीसँग कुराकानी गरेको जानकारी दिएका छन् । उत्तर प्रदेश सेतु निगम अन्तर्गत ७७ करोड ४१ लाख ४७ हजार भारतीय रुपैयाँ लागतमा कम गुणस्तरीय सामग्री प्रयोग भएको आरोप लाग्दै आएको थियो ।
प्रतिक्रिया दिनुहोस !
