काठमाडौँ: एमाले र माओवादीले केही दिनमै एकता हुने भएको छ । कम्युनिस्ट पार्टीको स्थापना दिवसको दिन वैशाख ९ गते हुने भनिएको एकता टरेपछि आशंका बढेका बेला दुई दलका शीर्ष नेता एकता नजिक पुगेका हुन् ।
वैशाख १८ वा २२ मा एकता घोषणा हुने पनि चर्चा थियो तर त्यसलाई औपचारिकता भने दिन सकेनन् दुई दलले । भारतीय प्रधानमन्त्री नरेन्द्र मोदी आउने भएपछि एकताको मिति सरेको थियो ।
यसबीचमा दुई दलबीच केही मतभेद बढेका समाचार पनि बाहिरिए । एकता मिति सर्दै गर्दा एकता नहुने अड्कलबाजी पनि भए । यसअघि गत मंसिरमा भएको निर्वाचनमा पार्टी एकतासम्म पुग्नैका लागि दुई दलले चुनावी गठबन्धन गरेका थिए । दुई दलको गठबन्धनको बलले नै कांग्रेसलाई पछार्दै कम्युनिस्टले बहुमत ल्याउन सफल भएका थिए ।
एकताबाट दुवै पार्टी धेरै टाढा गइसकेको विश्लेषण समेत भयो र भइरहेको छ । तर बुधबार एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालबीच भेट भएपछि दुई दल एकता नजिक पुगेका हुन् ।
दुवै नेताले एकतालाई अन्तिम रुप दिन एकता संयोजन समिति बोलाउनेदेखि 'नेपाल कम्युनिस्ट पार्टी' लाई निर्वाचन आयोगमा दर्ता गर्नेसम्मका प्रक्रिया अघि बढाउने सहमति गरिसकेका छन् ।
'माओवादी केन्द्रका ५ नम्बर प्रदेश ईन्चार्ज तथा नेता मणि थापाले दुई नेता एकताको एकदमै नजिक पुगेको जानकारी दिए । 'एकताको नजिक पुगेको खबर आएक छ, हाम्रो विस्तारित बैठक आजै ४ बजे बस्दैछ', थापाले भने, 'त्यो बैठकमा एकताको निचोडबारेमा अध्यक्ष कमरेडबाट ब्रिफिङ हुने कार्यक्रम छ ।'
दुई दलबीच विवाद बढिरहेको र सरकार पनि ओलीले एकलौटी चलाएको आरोप लागिरहेका बेला बुधबार दुई नेताबीचको बैठकमा एकताको ब्रेक थ्रु भएको बताइएको छ ।
मोदी भ्रमणका कारण ओली-प्रचण्डबीच सम्वादहीनताको अवस्थालाई तोड्दै दुई नेताबीच छलफल भएपछि एकताको निचोड निस्केको एमालेका एक नेता बताउँछन् ।
दुवैले बोलाए आकष्मिक बैठक
ओली-प्रचण्ड भेट भएपछि दुवै दलले आकष्मिक बैठक बोलाएका छन् । एमालेले भोलिलाई आकष्मिकरुपमा केन्द्रीय कार्य समिति बैठक बोलाएको छ ।
एमाले स्थायी समिति बैठक भने र माओवादीको विस्तारित बैठक आजै बस्दैछ । जनयुद्ध, चुनाव चिह्न र एकताको मोडालिटी अर्थात केन्द्रीय समिति, प्रादेशिक समितिको गठनबारे सहमति नभएको चर्चा चलिरहेका बेला एकताको निचोडमा दुई नेता पुगेका हुन् ।
दुवै नेताले बिहीबार एकता संयोजन समितिको बैठक बसाएर एकताको मिति घोषणा गर्ने सम्भावना रहेको एमालेका एक नेताले जानकारी दिएका छन् । ओली र दाहालबीच बुधबार एकताकै विषयमा अढाई घण्टा छलफल भएको छ ।
माओवादी केन्द्रका नेता जर्नादन शर्माले एकतालाई टुङ्गोमा पुर्याउन विषय दुवै नेता सहमत भइसकेको बताए । एकतामा भएको केही समयदेखिको अनिश्चितताले दुवै अध्यक्ष गम्भीर भएको उनले बताए ।
'दुवै नेता एकताप्रति गम्भीर हुनुहुन्छ, संयोजन समितिको बैठक भोली बिहान १० बस्नेछ', शर्माले भने, 'त्यो बैठकले एकता मिति तय गर्नसक्छ । संयोजक समितिले एकता मिति छिटै घोषणा गर्छ ।’
प्रधानमन्त्री ओलीका प्रेस संयोजक चेतन अधिकारीले कार्यदलको प्रतिवेदनबारे समेत दुवै अध्यक्षबीच छलफल भएको बताए । असहमतिका बुँदामा आ-आफ्नो पार्टीभित्र छलफल गराएर निश्कर्षमा पुर्याउन दुवै नेता सहमत भएका पनि अधिकारीले बताए । उनले एकतालाई सकारात्मक निश्कर्षमा पुर्याउन दुवै अध्यक्ष सहमत भएको बताए ।
के छ विवाद ?
पार्टी एकताका क्रमम एमालेले जनयुद्धको सट्टा जनक्रान्ति शब्द राख्नुपर्ने भनेको छ । तर एकताका लागि बनेका दुवै कार्यदलले भने कुनै विवाद नराखी प्रतिवेदन नेताहरुलाई बुझाइसकेका छन् ।
चुनाव चिन्हका विषयमा माओवादीका केही नेताको असहमति छ । उनीहरुले सूर्य चिन्हभित्र हतियाहथौडा राख्नु पर्ने बताइरहेका छन् । तर, गत निर्वाचनमा समेत माओवादीले सूर्य चिन्हलाई स्वीकारिसकेकाले यसमा ठुलो विवाद छैन ।
माओवादी समानताको आधारमा एकता गर्नु कुरा गरिरहेको छ भने एमाले स्थानीय, प्रदेश सभा, प्रतिनिधि सभाको निर्वाचनको आधारमा बाँटफाँट गर्नुपर्ने पक्षमा छ । प्रचण्डलाई सबैभन्दा चुनौती नेता व्यवस्थापन रहेको थियो ।
नेता व्यवस्थापनका लागि दुई शीर्ष नेताले नयाँ पार्टीको स्थायी समितिलाई कम्तिमा ४० सदस्यीय बनाउने कुरामा पनि मोटामोटी सहमति गरिसकेका छन् ।
यस्तो अवस्थामा दुई नेताबीच सकेसम्म भोली नभएमा एक साताभित्रमा एकता गर्ने बताएका छन् । 'कि त भोली नै नभए भोलि कम्तिमा एक सातापछिको मिति राखेर एकता घोषणा हुनेछ', माओवादीका एक नेताले भने ।
प्रतिक्रिया दिनुहोस !
