काठमाडौं : राष्ट्रिय प्रजातन्त्र पार्टीले अध्यक्षका अधिकारलाई कटौती गर्ने भएको छ । यही जेठ ७ देखि ९ गतेसम्म वीरगञ्जमा हुने केन्द्रीय परिषद्को बैठकले पार्टीको विधानमा हाल कायम रहेको अध्यक्षको धेरै अधिकारलाई कटौती गरी लोकतान्त्रिक बनाउन लागेको छ ।
पार्टीका प्रवक्ता भुवन पाठकका अनुसार पदाधिकारीको शतप्रतिशत अध्यक्षले मनोनीत गर्ने व्यवस्थालाई कटौती गरेर अब ५० प्रतिशत निर्वाचनबाट आउने व्यवस्था गरिएको छ । त्यसैगरी पार्टीको ४० प्रतिशत केन्द्रीय सदस्य मनोनीत गर्ने अधिकारलाई २५ प्रतिशतमा झारिएको छ ।
पदाधिकारीमा सहायक महामन्त्री र सहायक प्रवक्ता पदको खारेज गर्न लागिएको छ । पार्टीका वडा समिति, नगर समिति, महानगर समिति, क्षेत्रीय समिति र जिल्ला समितिका प्रत्येक इकाइमा समेत ५० प्रतिशत सदस्य निर्वाचनबाट आउनुपर्ने व्यवस्थालाई नयाँ विधानमा प्रस्ताव गरिएको छ ।
बैठकमा अध्यक्ष कमल थापार्ले राजनीतिक कार्यपत्र, महामन्त्री राजेन्द्र लिङ्देनले संगठनात्मक सुदृढीकरण कार्ययोजना, प्रवक्ता पाठकले प्रशिक्षणसम्बन्धी कार्ययोजना, केन्द्रीय सदस्य गोविन्द खनियाँले विधान संशोधनसम्बन्धी प्रस्ताव र केन्द्रीय सदस्य डा विष्णु भण्डारीले निर्वाचन समीक्षा प्रतिवेदन प्रस्तुत गर्नेछन् ।
करीब ५०० प्रतिनिधि सहभागी हुने उक्त बैठकले पूर्व पञ्च परिवेशका राजनीतिक दल तथा नेतालाई एकताका लागि आवश्यक रणनीति तयार गर्ने छ । महाधिवेशनपछिको ठूलो बैठकका रुपमा परिषद् भेलालाई मानिएको छ ।रासस
प्रतिक्रिया दिनुहोस !
