आफ्ना नागरिक फिर्ता गर्न दक्षिण कोरियालाई उत्तरको आग्रह

प्योङयाङ : उत्तर कोरियाले दक्षिण कोरियामा रहेका भनिएका आफ्नो देशका महिलालाई स्वदेश फिर्ता गर्न माग गरेको छ ।करिब दुई वर्षअघि आफ्नो देशका नागरिकलाई दक्षिण कोरियाका गुप्तचर अधिकारीले अपहरण गरेर लगेको बताएका उत्तर कोरियाको भनाइ छ । ती महिलालाई मुक्त गरी स्वदेश फिर्ता गर्न उत्तर कोरिया सरकारले माग गरेको उत्तर कोरियास्थित रेडक्रस सोसाइटीका प्रमुखलाई उद्धृत गर्दै उत्तर कोरियाको सरकारी समाचर समिति केसिएनएले जनाएको छ ।

ती महिलालाई दक्षिण कोरियाविरोधी क्रियाकलापमा लागेको भनेर अपहरण गरिएको थियो । उनीहरूलाई उत्तर कोरियाबाट नभएर उनीहरू कार्यरत रहेको अर्कै देशबाट अपहरण गरेर त्यहाँ ल्याइएको थियो । उक्त अपहरणको उत्तर कोरियाले त्यतिखेरै विरोध गरेको थियो । उनीहरूलाई तुरुन्त रिहा गरेर पछिल्लो समयमा विकसित शान्ति र सौहार्द वातावरणको सम्मान गर्न उत्तरले आग्रह गरेको छ।

यसैगरी उत्तर कोरियाले दक्षिण कोरियालाई दक्षिण कोरियाली राजधानी सोलमा भइरहेको अमेरिकी सैनिकसँगको संयुक्त सैन्य अभ्यास रोक्न फेरि पनि आग्रह गरेको छ । संयुक्त सैन्य अभ्यास सोलमा जारी रहेको भन्दै उत्तर र दक्षिण कोरियाका उच्चस्तरीय अधिकारीको बुधबार बस्ने भनिएको बैठकसमेत उत्तर कोरियाले रोकेको थियो ।

सोलमा दक्षिण कोरिया र अमेरिकाको संयुक्त सैन्य अभ्यास भइरहेको छ । उत्तर कोरियाले उक्त अभ्यासको विरोध गर्दै आएको छ । सैन्य अभ्यास रोक्न उत्तर कोरियाले बिहीबार पनि आग्रह गरेको थियो । दक्षिण कोरियाली र अमेरिकी सैन्य सम्मिलित उक्त हवाई सैन्य अभ्यास यही मे २५ सम्म जारी रहने जनाइएको छ । 

उत्तर कोरियाले भने सैन्य अभ्यास तत्कालै रोक्नुपर्ने माग गरेको छ । दक्षिण कोरियामा अहिलेसम्मकै सबैभन्दा ठूलो सैनिक अभ्यास शुरु भएको समाचारपछि नै उत्तर कोरियाले त्यसको विरोध गर्दै आएको छ । संयुक्त सैनिक अभ्यासले दुई कोरियाबीच गत अप्रिल २७ मा सम्पन्न शान्ति सम्झौताको पनि उल्लंघन गरेको उत्तर कोरियाको भनाइ छ । गत बिहीबार उत्तर कोरियाले उक्त सैनिक अभ्यास तत्कालै अन्त्य नगरे अमेरिकासँग हुने भनिएको बैठक पनि नगर्ने चेतावनी दिएको थियो ।

अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच आगामी जुन १२ मा सिंगापुरमा उच्चस्तरीय बैठक हुन लागेको छ । अमेरिका र उत्तर कोरियाले वार्ताका लागि तयारी गरिरहेको बताइरहेका छन् ।

उत्तर कोरियाले दक्षिण कोरियासँग केही सातापूर्व सम्पन्न समझदारी र शान्ति सम्झौताको पालना गर्न पनि आग्रह गरेको छ । गत अप्रिल २७ मा उत्तर कोरियाली नेता किम जोङ उन र दक्षिण कोरियाका राष्ट्रपति मुन जे इनबीच ऐतिहासिक वार्ता र शान्ति सम्झौता भएको थियो । उक्त शान्ति सम्झौता कार्यान्वयनका लागि आफूले त्यसैबमोजिमको काम गरिरहेको भए पनि दक्षिण कोरियाका तर्फबाट भने त्यसको पालना हुन नसकेको उसको आरोप छ । 

उत्तर कोरियाले अप्रिल २७ को शान्ति सम्झौताको कार्यान्वयनको शुरुआत गरेको जनाएको छ । उत्तरले आफूले आणविक अस्त्र उत्पादन र परीक्षणको काम पनि स्थगित गरेको जनाएको छ । आफूहरूले आणविक परीक्षणस्थल भत्काउने, आणविक अस्त्रको उत्पादन रोक्ने तथा आफ्नो जेलमा रहेका अमेरिकी र दक्षिण कोरियाली अधिकारीलाई पनि रिहा गरिरहेको तर दक्षिणले भने केही नगरेको उत्तरको आरोप छ ।

ट्रम्प-मुन फोनवार्ता

सोल : अमेरिकाका राष्ट्रपति डोनाल्ड ट्रम्प र दक्षिण कोरियाका राष्ट्रपति मुन जे इनबीचमा आइतबार उत्तर कोरियाको बारेमा फोनवार्ता भएको छ।
अमेरिकासँगको शिखर बैठक नगर्ने भनी उत्तर कोरियाले चेतावनी दिएपछि भएको यो कुराकानीलाई निकै महत्वका साथ हेरिएको छ । फोनवार्ता उत्तर कोरियामा नै केन्द्रित भएको दक्षिण कोरियाली राष्ट्रपतिको कार्यालयले जनाएको छ ।

अमेरिकाले यसअघिको सहमतिविपरीत संयुक्त सैन्य अभ्यासका विषयमा विवाद उत्पन्न गराएको भन्दै उत्तर कोरियाले अमेरिकासँगको शिखर वार्ता नगर्ने चेतावनी दिँदै आएको छ । अमेरिकासँगको विवादकै कारण उत्तर कोरियाले दक्षिण कोरियाका उच्च अधिकारीहरूसँगको बैठक पनि अन्तिम समयमा आएर स्थगित गरेको थियो ।

टेलिफोनमा भएको ट्रम्प र मुनको कुराकानीका क्रममा दुई देशले अझ नजिक भएर सहकार्य गर्ने समझदारी भएको राष्ट्रपतिको कार्यालयले जनाएको छ । ट्रम्पलाई भेट्न मुन आगामी मंगलबार वासिङटन जाने कार्यक्रम छ । उत्तर कोरिया र अमेरिकाको शिखर वार्तालाई सफल बनाउने वातावरण बनाउन भन्दै मुन वासिङटन जान लागेका हुन् । उत्तर कोरियाली नेता किम जोङ उन र अमेरिकी राष्ट्रपति ट्रम्पबीच जुन १२ तारिखमा सिंगापुरमा शिखर वार्ता गर्ने तय भएको छ ।