काठमाडौँः इन्डियन प्रिमियर लिग (आईपीएल) क्रिकेट खेलेर फर्किएका सन्दीप लामिछानेलाई सिप्रदी ट्रेडिङले कार दिने भएको छ । सिप्रदी ट्रेडिङले सन्दीपलाई बुधबार साँझ सोल्टी होटलमा एक कार्यक्रम आयोजना गरेर ब्रान्ड एम्बास्डडर घोषणा गरेर कार उपहार दिन लागेको हो ।
सिप्रदी ट्रेडिङका अनुसार सन्दीपलाई आगामी तीन वर्षका लागि ब्रान्ड एम्बास्डर घोषणा तथा कार प्रदान गर्नका लागि होटल सोल्टीमा साँझ साढे ६ बजे औपचारिक कार्यक्रम गर्न लागिएको हो ।
सिप्रदीले दिन लागेको कारबारेमा विस्तृत विवरण भने खुलाएको छैन । ‘हामीले सन्दीपसँग साँझ साढे ६ बजे औपचारिक कार्यक्रम गर्दैछौँ’, सिप्रदीका एक मार्केटिङ अधिकृतले भने, ‘अहिले नै सबै कुरा भन्न मिल्दैन, कार्यक्रममै हामी सबै कुरा सार्वजनिक गर्छौँ ।’
सन्दीपले यो सिजन दिल्ली डेयर डेभिल्सबाट आईपीएलका अन्तिम तीन खेलमा सहभागिता जनाउँदै ५ विकेट लिएका थिए । यसैबीच दिल्लीले सन्दीपलाई आफ्नो क्लबका तीन नयाँ खेलाडीमा सबैभन्दा प्रतिभावान पनि घोषित गरेको छ । सन्दीप आईपीएल खेलेर मंगलबार नेपाल फर्किएका छन् ।
प्रतिक्रिया दिनुहोस !
