काठमाडौं : राष्ट्रकवि माधवप्रसाद घिमिरेलाई बुधबार थप उपचारका लागि भारतको नयाँ दिल्ली लगिएको छ । उनको सानो आन्द्राबाट आन्तरिक रक्तस्राव नरोकिएपछि चिकित्सकको सल्लाहमा नै थप उपचारका लागि नयाँ दिल्लीस्थित मेहान्त अस्पतालमा लगिएको उनकी छोरी उषा अधिकारीले जानकारी दिएकी छन् ।
वैशाख २८ गते धापासीस्थित ग्राण्डी अस्पतालमा उपचार गराएका राष्ट्रकवि घिमिरेको रक्तस्राव नरोकिएपछि अपराह्न ५ बजे जेट एयरको विमानमार्फत भारत लगिएको उनले बताइन् ।
राष्ट्रकविको घिमिरेको सानो आन्द्राबाट भइरहेको रक्तस्रावको ठाउँ पत्ता लगाउन नसक्दा थप उपचारका लागि भारत लैजानु परेको उपचारमा संलग्न चिकित्सक डा विवेक शर्माले बताए ।
घिमिरेका साथमा छोरा इन्दीवर र ग्राण्डी अस्प्तालका चिकित्सक डा रोहित चौधरी भारत गएका छन् । करिब चार महिनादेखि अस्वस्थ हुँदै आएका घिमिरेलाई मेडिसिटी अस्पताल र ग्राण्डी अस्पतालमा उपचार भएको थियो ।
प्रधानमन्त्री केपी शर्मा ओलीले भारतीय चिकित्सकसँग परामर्श गरी घिमिरेलाई थप उपचारका लागि भारत लाने वातावरण बताइदिएका थिए । ओलीले सरकारले सम्पूर्ण खर्च बेहोर्ने बताएपछि उनलाई भारत लगिएको हो ।
प्रतिक्रिया दिनुहोस !
