कुन देशको बल खेल्ने भनी उरुग्वे-अर्जेन्टिना विवाद परेपछि...
जेठ ११, २०७५ शुक्रबार ८:५२:०
विश्वकप फुटबलमा यस्ता पनि घटना भएका छन्, जसले अहिलेका फुटबल समर्थकलाई आश्चर्यमा पार्ने गरेको छ । सन् १९३० मा आयोजना भएको पहिलो विश्वकप फुटबलको फाइनल खेलमा आयोजक उरुग्वे र अर्जेन्टिना भिडेका थिए । फाइनल खेलअघि उपाधिका लागि भिडेका दुई टोलीबीच कुन बल खेल्ने भन्ने विषयमा ठूलै विवाद भएको थियो ।
अर्जेन्टिनाले आफ्नो देशको बलले फाइनल खेलाउनुपर्ने माग गर्यो । त्यसपछि उरुग्वेले पनि आफ्नो देशको बलले फाइनल खेलाउनुपर्ने माग अघि सार्यो । विवाद बढ्दै गएपछि अन्तर्राष्ट्रिय फुटबल महासंघ (फिफा) ले दुवै टोलीलाई रिझाउने गरी एउटा तरिका निकाल्यो, फाइनलमा दुवै देशको बलले खेलाउने । तर कसरी ? पहिलो हाफमा एउटा देशको र दोस्रो हाफमा अर्को देशको बलले विश्वकपको फाइनल खेलाउने ।
त्यसमा दुवै देशले सहमति जनाए । त्यसपछि नयाँ विवाद आयो, कसको बलले पहिलो हाफको खेल खेलाउने ? त्यसको समाधान टसबाट निकाल्ने निर्णय भयो । टस गर्दा अर्जेन्टिनाको बलले पहिलो हाफ खेलाउने तय भयो । संयोग पनि गतिलै पर्यो, दुवै हाफको खेलमा जुन देशको बलले खेलाइयो त्यही देशले अग्रता बनायो । अर्थात्, पहिलो हाफमा अर्जेन्टिनाको बलले खेल्दा अर्जेन्टिना र दोस्रो हाफमा उरुग्वेको बलले खेल्दा उरुग्वेले नै अग्रता कायम गर्यो ।
पहिलो हाफमा अर्जेन्टिना २-१ र दोस्रो हाफमा उरुग्वे ३-० ले अगाडि रह्यो रह्यो । समग्रमा भने ४-२ को जितसहित उरुग्वे पहिलो विश्वकप फुटबलको विजेता बन्यो । पहिलो विश्वकपको फाइनलमा दुई देशको प्रतिनिधित्व गर्ने गरी फरक बलले खेलाइए पनि अहिले भने यो नियम परिवर्तन गरिएको छ । पछिल्ला विश्वकपमा जुनसुकै देशमा बनेको भए पनि आयोजकले तय गरेको बलले नै खेल्नुपर्ने नियम छ ।
प्रतिक्रिया दिनुहोस !
