काठमाडौँः नेपाल कम्युनिस्ट पार्टीका सांसद योगेश भट्टराईले प्रमुख प्रतिपक्षी दल नेपाली कांग्रेसको कडा आलोचना गरेका छन् । प्रतिनिधि सभाको शुक्रबार बसेको बैठकमा सरकारको नीति तथा कार्यक्रममा भाग लिँदै सांसद भट्टराईले कांग्रेसलाई आफ्नै इतिहासको गह्रौँ भारीले थिचेको भन्दै कटाक्ष पनि गरेका छन ।
‘प्रतिपक्षको रचनात्मक भूमिका संसदीय लोकतन्त्रको गहना हो । ‘आफ्नै मनको बाघ’ ले लखेटिरहेको वर्तमान प्रतिपक्ष आफैं भय, त्रास, अन्योल, अनिश्चय र द्विविधाको सिकार बनिरहेको छ’, भट्टराईले भनेका छन्, ‘ऊ आफ्नै इतिहासको गहुङ्गो भारीले असाध्यै नराम्ररी थिचिएको छ ।’
छलफलमा भाग लिँदै भट्टराईले सपना ज्यूँदो मान्छेले नै देख्ने बताउँदै ज्यूँदा मान्छेहरुको ज्यूँदो सरकार भएकाले धेरै सपना देख्नु स्वभाविक भएको पनि स्पष्टिकरण दिए । ‘सरकारको नीति तथा कार्यक्रम समाजवादोन्मुख भावी समृद्ध देशको मार्ग चित्र हो ।
प्रतिपक्षका माननीयज्यूहरुको अभिव्यक्ति बासी प्रश्नहरुको पुलिन्दा जस्तै छन् र समयले ताजा प्रश्नहरु जन्माएको छ र ताजा उत्तर खोजिरहेको छ’, कांग्रेसतर्फ इङ्गित गर्दै सांसद भट्टराईले भने, ‘बासी र पुराना प्रश्नतिर अल्यमल्याएर सत्तापक्षलाई अल्छी नबनाउन म प्रतिपक्षका मित्रहरुलाई अनुरोध गर्दछु ।’
मनहोनमाथिको ज्यादती सम्झाए
छलफलका क्रममा सांसद भट्टराईले नेपाली कांग्रेसको प्रतिपक्षी भूमिकामा आफूहरुले कुनै आँच आउन नदिने पनि प्रतिवद्धता जनाए । भट्टराईले भने, ‘लोकतन्त्रलाई पद्धतिको रुपमा मात्रै होइन संस्कृतिको रुपमा समेत अबलम्बन गर्दै आएको ‘नेपाल कम्युनिष्ट पार्टी’ प्रतिपक्षको संवैधानिक भूमिका र मर्यादाप्रति सदैव संवेदनशील छ र हुनेछ ।’
सांसद भट्टराईले २०४८ सालको संसदमा प्रतिपक्षी दलका नेता मनमोहन अधिकारीमाथि कांग्रेसबाट भएको ज्यादतीको पनि स्मरण गराए ।
‘२०४८ सालको संसदमा जस्तो वर्तमान संसदमा प्रतिपक्षले उपेक्षा भोग्नु पर्ने छैन । निधेषको अनुभव गनुपर्ने छैन । तत्कालीन अवस्थामा मृत्यु र जीवनसँग जुधिरहनु भएका आदरणीय नेता मनमोहन अधिकारीमाथि गरिएको अमावनीय र संवेदनहीन व्यवहार यो संसदको कुनै पनि माननीय सदस्यमाथि पुनरावृत्ति हुने छैन’, उनले भने,‘बिर्सन लायक संवेदनहीन कदम दोहोरिन दिने छैनौं भन्ने कुरामा म विश्वास व्यक्त गर्न चाहन्छु ।’
दलालका दिन गए
नीति तथा कार्यक्रममा छलफलका क्रममा सांसद भट्टराईले अब दलालहरुले राज्य कब्जा गर्ने दिन गएका दाबी गरे । ‘सिद्धान्त र इतिहासको मृत्यु’ भयो भन्ने भ्रान्तीलाई प्रचार गरेर राज्यलाई दलालहरुले कब्जा गर्ने, राज्य र जनताबीचमा सदैव शत्रुतापूर्ण सम्बन्ध बनाइरहने मान्यता कुनै पनि वहाना र मूल्यमा हामीलाई स्वीकार्य छैन’, भट्टराईले थपे, ‘तसर्थ, यो नीति तथा कार्यक्रमले शिक्षा, स्वास्थ्य, खानेपानी, रोजगारीलगायतमा राज्यको नेतृत्वदायी भूमिकालाई स्वीकार गरेको छ ।’
सांसद भट्टराईले लोककल्याणकारी राज्यको स्थापना सँगै राजनीतिक संस्थाहरुमा बढ्दो दलाली चरित्रलाई अन्त्य गर्ने अपेक्षा गरिएको पनि बताएका छन् । ‘सांसद, जनप्रतिनिधिमुलक संस्था व्यवस्था, दल र नेतृत्वले विगतमा आफ्नो साख बचाउन नसक्दा जसरी मुलुकले ठूला–ठूला क्षति व्यहोर्नु पर्यो । राष्ट्रको समय बर्बाद भयो । हाम्रा पूर्खाहरुले आफ्नो उर्बर र अमूल्य समय निर्माणमा होइन अभियान र आन्दोलनमा खर्चिनु प¥यो’, उनले थपे, ‘यसबाट पाठ सिक्दै राजनीतिक संस्थाहरुभित्र यो वा त्यो कुनाबाट प्रभाव विस्तार गरिरहेको दलाल प्रवृत्तिलाई अन्त्य गर्दे संसदमार्फत व्यबस्थाले आफ्नो विश्वास बचाई राख्नु पर्नेछ । यो हाम्रो सबैको साझा दायित्व पनि हो ।’
अब विकास र समृद्धिको अर्को विकल्प नभएको पनि भट्टराईले बताए । ‘चौडा सडक, अग्ला भवन, रेल, पानीजहाज, ठूला हवाई मैदान आदि यो नीति तथा कार्यक्रममा चर्चित प्रस्तावहरु हुन् । तर, प्रश्न छ, ‘यो सबै के–का लागि ? कसका लागि ?’ यसले विद्यमान सामाजिक संरचना र वर्ग संरचनामा के परिवर्तन ल्याउँछ ?’, उनले भने, ‘तर, हामी प्रष्ट छौं, ‘यसले ल्याउने प्रतिफल ती तमाम सीमान्तकृत र श्रमजीवि जनताको जीवनमा उज्यालो ल्याउनु हो । अनेकौ बोझ, पीडा र नियतिहरुले अभिशप्त उनीहरुको अनुहारमा मुस्कान ल्याउनु हो ।’ त्यही हो, समाजवादी दिशा अनि त्यही हो सामाजिक न्याय भनेको पनि । जो, यो नीति तथा कार्यक्रममा प्रतिबद्धताको रुपमा रहेको छ ।’
प्रतिक्रिया दिनुहोस !
