जाजरकोट : डोल्पामा यार्सागुम्बा संकलन गर्न गएका तीनजनाको लेक लागेर शनिबार मृत्यु भएको छ। लेक लागेर गम्भीर बिरामी भएका एक जनाको हेलिकोप्टरबाट उद्धार गरिएको छ।
डोल्पा जिल्ला त्रिपुरासुन्दरी नगरपालिका १० लिकुका ३० वर्षीय नारायणप्रसाद पहाडी, जाजरकोट नलगाड नगरपालिका ८ खगेनकोट का १५ वर्षीय भद्रबहादुर चनारा र काइके गाउँपालिकाको सुन्दरे शेर्पा आधारभूत विद्यालय टुप्पाताराका शिक्षक शेरबहादुर रानाको लेक लागेर शनिबार मृत्यु भएको हो।
यार्सागुम्बा संकलनका लागि डोल्पाको ठूलीभेरी नगरपालिका १० मा पर्ने ग्यालवारा पाटन पुगेका पहाडी लेक लागेर विरामी भई दुनैतर्फ ल्याउदै गर्दा माझवनमा मृत्यु भएको हो। डोल्पोबुद्ध गाउँपालिकाको धो ताक्सी पुगेका जाजरकोटका चनारा लेक लागेर विरामी भएपछि उपचारका लागि दुनैतर्फ ल्याउँदै गरेको बेला शनिबार राति डोल्पोबुद्ध गाउँपालिका २ मा पर्ने तोलतोल भन्ने ठाउँमा मृत्यु भएको प्रहरीले जानकारी दिएको छ। त्यसैगरी रानाको पाटनतर्फ जाँदै गर्दा लेक लागेर मृत्यु भएको डोल्पाका सहायक प्रमुख जिल्ला अधिकारी इन्द्रप्रसाद चापागाईंले बताए। कमाई गर्न भनेर गएकाको लेक लागेर मृत्यु भएपछि परिवारजन समस्यामा परेका छन्। शोकाकुल परिवारजनले सरकारसँग उचित राहतको माग गरेका छन्।
लेक लागेर धो ताक्सी पाटनमा सिकिस्त विरामी परेका आठबीसकोट नगरपालिका १० रुकुमका हरिबहादुर शाहीको नेपाली सेनाको हेलिकोप्टरबाट उद्धार गरी उपचारका लागि नेपालगञ्ज पुर्याइएको सांसद सत्या पहाडीले जानकारी दिइन।
विश्व कै उच्च मानववस्ती मानिने धो ताक्सी ४ हजार २ सयको उचाईमा छ। धो ताक्सी बस्ती भन्दामाथि उचाई भएका पाटनमा यार्सागुम्बा पाइन्छ। डोल्पाका ताक्सी भन्दा उचाई रहेका दर्जनौ पाटनमा यार्सा पाइन्छ। डोल्पाका ती यार्सागुम्बा पाइने सबै पाटनमा यतिबेला हजारौं यार्चा संकलक पुगेका छन्। सञ्चारको सुविधान नभएकाले अन्य यार्सा संकलक कस्तो समस्यामा छन् भन्ने जानकारी आएको छैन।
प्रतिक्रिया दिनुहोस !
