पेरिस : आगामी विश्वकपमा फ्रान्स र अस्ट्रेलिया एउटै समूहमा परेका छन् । अस्ट्रेलियन टोलीको नेतृत्व गर्ने ६६ वर्षीय डच नागरिक बेर्ट भान मार्विक रुस विश्वकपका सबैभन्दा अनुभवी प्रशिक्षकमा पर्छन् । प्रशिक्षक मार्विककै विश्लेषण र अनुभवलाई आधार मान्ने हो भने फ्रान्सले आगामी विश्वकपको उपाधि घर लगेमा कसैले आश्चर्य नमाने हुन्छ । ‘फ्रान्सेली टोलीमा निकै क्षमतावान्, छरिता र शारीरिक रूपमा पनि बलिया खेलाडीको वर्चस्व छ । विश्वकै उत्कृष्ट खेलाडी पनि छन्, फ्रान्सँग । यस्तो स्थितिमा फ्रान्सले उपाधि जिते कसैले पनि अचम्म नमाने हुन्छ’, प्रशिक्षक मार्विकले एक अन्तर्वार्ताका क्रममा भनेका छन् ।
पक्कै पनि, रुस विश्वकपमा समूह ‘सी’ मा रहेको फ्रान्स तुलनात्मक रूपमा बलियो देखिएको छ । उक्त समूहमा अस्ट्रेलिया, डेनमार्क र पेरू परेकाले पनि फ्रान्सलाई समूहगत चरण पार गर्न खासै कठिन हुने छैन । फ्रान्सले जुलाई १६ तारिखमा अस्ट्रेलियासँग खेल्दै रुस विश्वकपको थालनी गर्नेछ । वास्तवमा मार्विकले भनेजस्तै फ्रान्स यसपटक बलियो टोलीको रूपमा स्थापित भएको छ । सन् १९९० को दशकमा पनि फ्रान्स इतिहासकै बलियो थियो । त्यसैले त सन् १९९८ मा फ्रान्सले घरेलु मैदानमा ब्राजिलजस्तो बलियो टोलीलाई ३–० गोलले हराउँदै उपाधि चुमेको थियो ।
वास्तवमा फ्रान्स सधैं विश्वकपको बलियो टोली हो । जाइन्ट किलरको छवि बनाएको फ्रान्सले हरेक विश्वकपमा दमदार प्रदर्शन गर्दै आएको छ । यति हुँदाहुँदै पनि फ्रान्सले दोस्रो उपाधि भने हात पर्न सकेको छैन । सन् १९३० को पहिलो विश्वकपदेखि नै सहभागिता जनाउँदै आएको फ्रान्सले हालसम्म १४ पटक सहभागिता जनाएको छ । यस क्रममा फ्रान्स दुई पटक फाइनलमा पुगेको थियो भने पाँच पटक सेमिफाइनलमा पुगेको छ । टोलीमा रहेका प्रभावशाली खेलाडी र लामो समयको तयारीलाई यसपटक फ्रान्सले आफ्नो प्रमुख हतियार बनाएको छ ।
प्रशिक्षक डिडियर डेसच्याम्पसले रुस विश्वकपका लागि प्रारम्भिक टोलीको घोषणासमेत गरिसकेका छन् । उनले आफ्नो टोलीमा अनुभवी र नयाँ खेलाडीको राम्रो संयोजन गरेका छन् । सन् २०१२ देखि फ्रान्स टोली सम्हालेका डेसच्याम्पसलाई टोलीको कमजोरी र क्षमताबारे पनि राम्रो ज्ञान छ । उनले रुस विश्वकपलाई यादगर बनाउने दाबी पनि गरेका छन् । उनले टोट्टनहामका ह्युगो लोरिस, पेरिस सेन्ट जर्मन क्लबका अल्फोन्से एरोलाजस्ता गोलरक्षकलाई गोल पोस्टको जिम्मेवारी सुम्पिएका छन् । रक्षापंक्तिमा समेत बार्सिलोनाका म्यानुएल उम्टिटी, रियल म्याड्रिडका राफेल भारानेजस्ता खेलाडी उतार्ने तयारीमा छन् ।
पछिल्लो समय फ्रान्सको डिफेन्स, मिडफिल्ड र स्ट्राइकिङ लाइन निकै बलियो देखिएको छ । छोटो र छरितो पास खेल्ने फ्रान्सको शैली पनि बेजोडको छ । विपक्षीलाई नियन्त्रणमा राख्ने र बल छलाउने कला फ्रान्सको अर्को हतियार हो । फ्रेन्च लिग र प्रिमियर लिग, स्पेनिस ला लिगा खेलिरहेका युवा र दमदार खेलाडीको साथ फ्रान्सलाई छ । टोलीमा एट्लेटिको म्याड्रिडका स्ट्राइकर एन्टोनी ग्रिजम्यान, चेल्सीका ओलिभर गिरोड, बार्सिलोनाका ओसमेन डेम्बेलजस्ता अनुभवी स्ट्राइकर छन् ।
यसैगरी युवा खेलाडी काइलियन एमबाब्बेलाई पनि प्रशिक्षक डेसच्याम्पसले महत्वपूर्ण यतियारका रूपमा लिएका छन् । पछिल्लो समय एमबाब्बेको प्रदर्शन पनि स्तरिय छ । मिडफिल्डमा चेल्सीका एनगोलो कान्टे र म्यानचेस्टर युनाइटेडका पल पोग्वाजस्ता अनुभवी खेलाडीको साथ पनि छ, फ्रान्सलाई । विश्वकप छनोट प्रतियोगितामा पनि फ्रान्सले उत्कृष्ट प्रदर्शन गरेको थियो ।
युरोपेली क्षेत्रबाट समूह ‘ए’ को विजेता बन्दै रुस विश्वकपको ढोका खोलेको फ्रान्सले समूहगत चरणमा स्विडेनसँग एउटा खेल मात्र हारेको थियो । फ्रान्स सन् २०१६ मा घरेलु मैदानमा भएको युरो कपमा फाइनलसम्म पुगेको थियो । फाइनलमा भने फ्रान्सलाई पोर्चुगलले थप समयमा १–० गोलले हराएको थियो । २४ टोली सम्मिलित युरो कपमा आफूलाई प्रमाणित गरिसकेकोले पनि आगामी विश्वकपमा फ्रान्सलाई बलियो दाबेदारको रूपमा हेरिएको छ ।
फ्रान्सको प्रारम्भिक टोली
गोलरक्षक : ह्युगो लोरिस (टोट्टनहाम), स्टिभ मान्डाना (मार्सिल्ले) र अल्फोन्से एरोला (पीएसजी) ।
डिफेन्डर : डिब्रिल सिडिबे (मोनाको), बेन्जामिन पाभर्ड (स्टुटगार्ट), सामुएल उम्टिटी (बार्सिलोना), राफेल भाराने (रियल म्याड्रिड), प्रेसनल किमपेम्बे (पीएसजी), अदिल रामी (मार्सिल्ले), बेन्जामिन मेन्डी (म्यानचेस्टर सिटी) र लुकास हर्नान्डेज (एट्लेटिको म्याड्रिड) ।
मिडफिल्डर : पल पोग्बा (म्यानचेस्टर युनाइटेड), कारेन्टिन टोलिसो (बायर्न म्युनिख), ब्लाइस माटुडी (युभेन्ट्स), एनगोलो कान्टे (चेल्सी) र स्टिभन एनजोन्जी (सेभिल) ।
स्ट्राइकर : एन्टोनियो ग्रिजम्यान (एट्लेटिको म्याड्रिड), ओलिभर गिरोड (चेल्सी), काइलियन एमबाप्पे (पीएसजी), ओसमेन डेम्बेल (बार्सिलोना), फ्लोरिन थाउभिन (मार्सिल्ले), नबिल फेकिर (लियोन) र थोमस लेमर (मोनाको) ।
प्रशिक्षक : डिडियर डेसच्याम्पस ।
फ्रान्स
सहभागिता : १५औं पटक
उपाधि : १ पटक
फिफा वरीयता : ७
फ्रान्सको खेल
समूह ‘सी’
जुन १६ : अस्ट्रेलियाविरुद्घ
जुन २१ : पेरुविरुद्घ
जुन २६ : डेनमार्कविरुद्घ
प्रतिक्रिया दिनुहोस !
