पोखरा : गर्मी छल्न पोखरा आउने र मुस्ताङको मुक्तिनाथ मन्दिर दर्शन गर्ने भारतीय पर्यटकको संख्या बढेको छ । बसबाट धार्मिक तीर्थ यात्रा गर्न आउने र कारबाट पोखरा घुम्न आउने भारतीय पर्यटको संख्या बढेको हो । जेठ अन्तिम सातादेखि पदयात्राका लागि आउने युरोप, अमेरिकाका पर्यटकको आगमन कम हुने गर्छ । त्यसैले जेठ अन्तिम सातादेखि भदौ दोस्रो साता ‘अफ सिजन’ मानिन्छ । भूकम्पअघिसम्म यो सिजनमा चिनियाँ पर्यटकको आगमन बढेको थियो । भूकम्पपछिको अवस्थामा चिनियाँ पर्यटकको आगमन बढ्न नसकेको पश्चिमाञ्चल होटल संघ पोखराका अध्यक्ष विकल तुलाचनले बताए ।
पोखरा घुम्न र धार्मिक यात्राका लागि पछिल्लो समय पोखरा आउने भारतीय पर्यटक बढेको तुलाचनको भनाइ छ । हिन्दू र बौद्ध धर्मालम्बीको साझा धार्मिकस्थलका रूपमा प्रसिद्ध मुक्तिनाथ मन्दिरमा दर्शन गर्न पर्यटक बस रिजर्भ गरेर आउने गर्छन् । पोखरा मात्र घुम्न निजी सवारी साधन लिएर आउने भारतीय पर्यटक पनि बढेका छन् । गत वर्ष पनि भारतीय पर्यटक बढेका थिए । यस वर्ष अफ सिजन मानिएको समयमा भारतीय पर्यटक गत वर्षभन्दा बढी आइरहेको अध्यक्ष तुलाचनले जानकारी दिए ।
अहिले पोखराका होटलमा सबभन्दा धेरै भारतीय पर्यटक छन् । नेपाल आएका पर्यटकमध्ये ३० प्रतिशत पोखरा आएको र तीमध्ये १५ प्रतिशत भारतीय पर्यटक रहेको अध्यक्ष तुलाचनले सुनाए । ७ प्रतिशत युरोपियन, अमेरिकी, चाइनिज र अन्य आन्तरिक पर्यटक पोखरामा रहेको अनुमान उनको छ । भारतको गुजरातकी पर्यटक गीता मालङ्करले यस समयमा पोखराको मौसमअनुकूल रहेको र यहाँको प्राकृतिक सुन्दरताबारे सुनेर घुम्न आएको सुनाइन् ।
पोखराबारे आफूले सुनेभन्दा राम्रो लागेको उनले बताइन् । यहाँको हरियाली, डाँडाकाँडा, ताल, धार्मिक मठमन्दिरले आफूलाई आकर्षण गरेको उनको भनाइ छ । त्यसैगरी, गुजरातकै पर्थ मालाङ्करले पशुपतिनाथका दर्शन, मनकामना मन्दिरको दर्शन गरेर गुजरात, महाराष्ट्र र मुम्बईबाट ९० जनाको टोली पोखरा घुम्न आएको सुनाए । भारतमा यतिबेला गर्मी बढेको र यहाँको मौसमबाट आफू प्रभावित भएको मालाङ्करले बताए ।
मुक्तिनाथ जाने भारतीय पर्यटक बढेको मुक्तिनाथस्थित होटल ग्रान्ड साम्बालाका सञ्चालक सुरज गुरुङले जानकारी दिए । मुक्तिनाथको रानीपौवामा भारतीय गुरुको प्रवचनसमेत चलेकाले भारतीय पर्यटकको आउने–जाने क्रम बढेको उनको भनाइ छ । एक साताको प्रवचन सकेर आइतबारदेखि फेरि अर्को प्रवचन सुरु भएकाले भारतीय धार्मिक पर्यटक आउने–जाने क्रम बढेको गुरुङले बताए ।
मुक्तिनाथमा २२ वटा होटलमा करिब ७ सय बेड संख्या रहेकामा अधिकांश भारतीय पर्यटक रहेको उनले बताए । पदत्रायका लागि अफ सिजन सुरु भएकाले अहिले युरोपियन, अमेरिकी पदयात्रा गर्ने पर्यटक कम रहेको पनि उनले जानकारी दिए । हिमाली जिल्ला मुस्ताङको मुक्तिनाथ मन्दिर समुद्र सतहदेखि ३ हजार ७ सय १० मिटर उचाइमा छ । त्यहाँबाट धौलागिरि, नीलगिरि, थोरङलालगायत सुन्दर हिमशृंखला देखिन्छ ।
प्रतिक्रिया दिनुहोस !
