विद्यार्थी फेल गराउने शिक्षा प्रणाली अपराधी छ : प्रधानमन्त्री ओली

काठमाडौं : प्रधानमन्त्री केपी शर्मा ओलीले बालबालिकालाई असफल गराएर सरकार र शिक्षा प्रणालीले अपराध गरिरहेको बताएका छन्। बुधबार नेपाल राष्ट्रिय शिक्षक संगठनको १२ औं महाधिवेशनको उद्घाटन गर्दै प्रधानमन्त्री ओलीले शिक्षा प्रणाली अपराधी भएको बताएका हुन् । 

प्रधानमन्त्री ओलीले हरेक बालबालिकामा फरक-फरक क्षमता हुने तर शिक्षाले सैद्धान्तिक ज्ञानलाई मात्र मान्यता दिएर बच्चालाई असफल बनाउँदै ठूलो अन्याय गरेको बताए । ‘असाधरण क्षमता भएका साना नानीलाई हामी फेल बनाएर उनीहरुको हृदयमा बन्चरो हानिरहेका छौं’, प्रधानमन्त्री ओलीले भने, ‘ति बच्चा फेल होइन सरकार, शिक्षक, विद्यालय, पाठ्यक्रम र शिक्षा प्रणाली फेल हुँदै छ ।’  बच्चाको क्षमता पहिचान गरेर रुचीको विधामा उनीलाई सिक्ने अवसर प्रदान गर्नुपर्ने ओलीको भनाइ छ ।

प्रधानमन्त्री ओलीले सरकारी विद्यालयको नतिजा सन्तोषजनक नरहेको स्वीकार गर्दै शिक्षकलाई नतिजा सुधार्नका लागि कक्षा कोठामा प्रविधिको प्रयोग र शिक्षकलाई अध्ययन गर्ने बानी गर्न आग्रह गरे । ‘पढाउन नजान्ने शिक्षक राखेर हुदैन’, प्रधानमन्त्री ओलीले भने, ‘सबै शिक्षकले आफूले पढाउने बिषयमा दक्षता हासिल गर्नुहोस् । विषयवस्तुको ज्ञान शिक्षकलाई नै छैन भने कसरी पढाउनुहुन्छ ?’ अस्थायी शिक्षकका समस्या समाधान गर्न पनि सरकार गम्भीर भएको प्रधानमन्त्री ओलीको भनाइ छ ।