काठमाडौँः नेपालको विमानस्थलबाट हुने गरेको अर्बौँ मूल्यको सुन तस्करीको बहसले बिहीबारको संसद बैठकमा पनि निरन्तरता पायो ।
बिहीबारको प्रतिनिधि सभाको बैठकमा बजेटठमाथिको छलफलमा बोल्दै नेपाल मजदुर किसान पार्टीका सांसद प्रेम सुवालले सुनकाण्डबारे बोल्दै नेपालमा बहुदल आएको १० वर्षमै सुन तस्करीले बिकराल रुप लिएको बताए ।
‘सभामुखज्यू (कृष्णबहादुर महरा) अर्थमन्त्री हुँदा म त भुरा मात्रै हुँ, धेरै ठुला माछा छन् यसमा, यसको उत्तर समयक्रममा आउला भनेको सम्झिरहेको छु’, सुवालले भने, ‘मन्त्रीले भनेको ठुलो माछा प्रधामन्त्री नै त होला होइन भन्ने प्रश्न उठेको छ ।’
सांसद सुवालले देशलाई आर्थिक विकासतर्फ अघि बढाउन सकिने बताउँदै सबैभन्दा पहिले प्रधानमन्त्री निवास बालुवाटारलाई ठगहरुबाट जोगाउनु सबैभन्दा ठुलो कुरा भएको जिकिर गरे ।
भारतमा ७० वर्षमा देखिएको सुन तस्करीको समस्या नेपालमा १० वर्षमै देखिएको बताउँदै सुवालले यसको जरैसम्म पुग्न सक्नुपर्नेमा जोड दिए । नेपालमा तलब भत्ता भन्दा महँगी धेरै बढ्ने गरेको बताउँदै सुवालले सोभियत संघमा कुनै बेला दशकौँसम्म महँगी नबढेको उदाहारण दिए ।
सुवालले नेपालमा प्रहरी भन्दा चोर अगाडि बढ्नु अनौठो नभएको पनि जिकिर गरे । उनले नेपालमा ठुला नदीहरुमा बाँध बाँध्न सकेमा देशका कुनाकाप्चासम्म पानी जहाज पुर्याउन सकिने पनि बताए ।
प्रतिक्रिया दिनुहोस !
