नुवाकोटः नुवाकोटमा विहीवार कार्यालय समयमै एक जना सरकारी कर्मचारीसहित इन्जिनियरहरु कार्यकक्षमै चेस खेलिरहेको अवस्थामा भेटिएका छन् । विनाशकारी भुकम्पपछिको पुनर्निर्माणको जिम्मेवारी रहेको सरकारी कार्यालय शहरी विकास तथा भवन निर्माण डिभिजन कार्यालयमा सांसद नारायणप्रसाद खतिवडाले छड्के अनुगमन गर्दा सरकारी कर्मचारी कार्यकक्षमै चेस खेलिरहेको अवस्थामा भेटिएका हुन् ।
सांसद खतिवडासहित र पत्रकारहरुले टोलीले संयुक्त रुपमा गरेको कार्यालय अनुगमनका क्रममा कार्यालयका सब–इन्जिनियर आभाष पौडेलसहित तीनजना चेस खेलिरहेको अवस्थामा फेला परेका हुन् । सरकारी कर्मचारी र निकायको ढिलासुस्तीका कारण निर्माण थालेका र सम्पन्न गरिसकेका लाभग्राहीहरु आफ्नो काम नभएको गुनासो गरिरहेका छन् ।
सरकारी कार्यालय कर्मचारी अभावमा काम हुन नसकेको ओठे जवाफ दिइरहेको छ । तर, कर्मचारीहरु कार्यालय समयमा खेलवाड र मोजमस्तीमा छन् । विहीवार विदुर नगरपालिका–९ कोलोनीमा रहेको शहरी विकास तथा भवन निर्माण बिभाग डिभिजन कार्यालयमा दिउँसो १ बजेर ५८ मिनेटमा पुग्दा कर्मचारी टेबुलभरी असरल्ल काम थुपारेर चेस खेलिरहेको अवस्थामा भेटिएका हुन् ।
सांसद खतिवडाले रंगेहात फेला परेका सव–ईञ्जिनियर आभाष पौडेलले खाजा खाने समयमा समयमा मनोरञ्जन गरेको दाबी गरे । आफ्नै कार्यकक्षमा भवन निर्माणको जिम्मेवारी लिएर आएका अन्य दुईजना जम्मा पारेर उनी चेसमा भिडिरहेका थिए ।
तीन वर्षदेखि भूकम्पपीडितहरु सरकारी प्रक्रियाका कारण र कर्मचारीले दिएको दुखका कारण पीडामा छन् । तर, जिम्मेवार कर्मचारी भने काम छैन भन्दै कार्यालय समयमै र कार्यालय भित्रै खेलेर बसेका छन् । तीन वर्ष अगाडिको भुकम्प पीडितलाई कस्तो सेवा प्रदान भइरहेको छ र कामकाजको शैलीका वारेमा अनुगमन गर्न पुगेका प्रतिनिधि सभा सदस्य नारायणप्रसाद खतिवडाले निमित्त कार्यालय प्रमुख आत्मकुमार शाहसंग कर्मचारीले कार्यालय समयमा चेस खेलेको जानकारी गराए ।
प्रतिनिधिसभा सदस्य नारायणप्रसाद खतिवडा र पत्रकारको संयुक्त अनुगमनमा लापरबाही भेटिएपछि सव–ईञ्जिनियर पौडेल र भवन शाखाको कार्यालय बनाउन ठेकेदार कम्पनीको जिम्मा लिएर आएका अन्य दुई कर्मचारीलाई निमित्त कार्यालय प्रमुखले तत्कालै स्ष्टिकरण लिएका छन् । निमित्त कार्यालय प्रमुख शाहले उनीहरुबारेमा विभागमासमेत जानकारी गराइसकेको ताए ।
भवन कार्यालयका शवईञ्जिनियर आभाष पौडेल, बन्दना भगवती निर्माण सेवाका ईञ्जिनियरहरु मदन खत्री र निरञ्जन खड्कालाई भवन शाखाका निमित्त प्रमुख आत्मकुमार शाहले प्रष्टिकरण लिएर सम्बन्धित कार्यालयमा मौखिक जानकारी गराइसकेका छन् । प्रतिनिधि सभा सदस्य नारायणप्रसाद खतिवडाले बिहीवारै नुवाकोटका तीन वटा सरकारी कार्यालयको अवलोकन गरेका हुन् ।
प्रतिक्रिया दिनुहोस !
