ट्राफिक प्रहरीको अनुभव : 'धन्यवाददेखि अपशब्दसम्म सुन्नुपर्छ'
![ट्राफिक प्रहरीको अनुभव : 'धन्यवाददेखि अपशब्दसम्म सुन्नुपर्छ'](https://annapurnapost.prixacdn.net/media/albums/trafic_20180530161651_20180601081945_FbBCh09AYG.jpg)
के छ हालखबर ?
ठीकै छ ।
घर कता पर्यो ?
धादिङ ।
यता कता बस्नुहुन्छ ?
महाराजगञ्जतिर ।
ट्राफिक प्रहरी बन्ने सोच कसरी आयो ?
टीभीमा प्रहरीको कार्यक्रम खूब हेर्थें । नेपाल प्रहरीको ड्रेस पनि धेरै मन पथ्र्यो । सानैदेखि रहर भएकाले प्रहरीको जागिर खाइयो ।
कति वर्ष भयो जागिर गरेको ?
चार वर्ष ।
पढ्दै हुनुहुन्छ ?
ब्याचलर गर्दैछु ।
काम गर्दै पढ्न भ्याइन्छ त ?
कलेज जान त के भ्याउनु । बिहानदेखि नै ड्युटीमा खट्नुपर्छ । स्वअध्ययन गरिन्छ ।
ट्राफिक प्रहरीमा आउनुअघि के गर्नुहुन्थ्यो ?
धादिङमा हुँदा एनजीओतिर सानोतिनो काम गर्थें । अनि, बच्चाहरूलाई पढाउँथेँ ।
काममा घरपरिवारको सहयोग होला नि ?
सुरुमा त आमाबुबालाई प्रहरी बनेको खासै मन परेको थिएन । अरू नै जागिर गर् भन्नुहुन्थ्यो । तर, मेरो रुचि प्रहरीमै भएकाले यता आएँ । अहिले त उहाँहरू पनि खुशी हुनुहुन्छ ।
ट्राफिक भएर सडकमा उभिएको पहिलो दिनको अनुभव कस्तो रह्यो ?
ट्रेनिङको क्रममा त खूब रमाइलो लागेको थियो । तर, सुरुको दिन सडकमा खटेर काम गर्दा अनौठो लाग्यो । सिटी फुक्दा पनि अर्कै आवाज आउँथ्यो । कसैले केही भन्ने हो कि भन्ने डर लाग्थ्यो ।
बाटोमा के–कस्ता समस्या आइपर्छन् ?
सडकमा धेरै थरी मान्छे भेटिन्छन् । कोही कागजपत्र माग्दा सजिलै दिन्छन्, कोही चाहिँ भनेको टेर्दैनन् । त्यस्ता मान्छेसँग झमेला बढी हुन्छ ।
त्यस्तो अवस्थामा कसरी ह्यान्डल गर्नुहुन्छ ?
के ह्यान्डल गर्नु र ? फुत्तै भागिहाल्छन् ।
सुरु–सुरुमा लामो समय सडकमा उभिनुपर्दा गाह्रो हुन्थ्यो होला है ?
हातखुट्टा बेस्सरी दुख्थ्यो । बानी नपर्दासम्म त भनन्न रिँगटै लाग्थ्यो नि ।
काम गर्दा कुन बेला असहज महसुस हुन्छ ?
चारैतिर सडक खुलाउनुपर्ने अवस्थामा असहज हुन्छ । त्यतिखेर सडकयात्रुले कुरा नै बुझिदिँदैनन् । उल्टै हामीलाई कराउँछन् ।
सडकमा के–कस्ता खाले यात्रु भेट्नुहुन्छ ?
धन्यवाद दिनेदेखि अपशब्द बोलेर जाने सबै किसिमका मानिस भेटिन्छन् ।
कुन बेला नराम्रो लाग्छ ?
महिला ट्राफिक भनेर कमजोर ठान्छन् । काम गरिरहँदा पनि मान्छेले कहिलेकाहीँ राम्रो व्यवहार नगरिदिँदा एकदमै नमज्जा लाग्छ ।
अनि, कतिखेर चाहिँ रमाइलो लाग्छ ?
जनताको सेवामा खटिन पाएको छु, यसैमा आनन्द लाग्छ । सडकमा सानो सहयोग गर्दा यात्रीले धन्यवाद दिँदा मन खुशी हुन्छ ।
ट्राफिक प्रहरीको काममा के कसो गाह्रो छ ?
धुवाँधुलो, चर्को घाममा उभिनुपर्छ । गर्मीमा घामले टाउकै फुट्ला जस्तो हुन्छ । ड्युटी नसकुञ्जेल कतै हलचल गर्न पाइँदैन यस्तै–यस्तै अप्ठ्यारा छन् ।
स्वास्थ्य समस्या पनि त होला नि ?
किन नहुनु । ढाड दुख्ने, खुट्टा दुख्नेलगायत समस्या छ ।
फुर्सदमा के गर्नुहुन्छ ?
घरतिर फोन गर्छु । फेसबुकतिर साथीभाइसँग गफगाफ गर्छु ।
के भइदिए ट्राफिक प्रहरीलाई काम गर्न सहज हुन्थ्यो ?
सवारी चालकले नियममा रहेर गाडी चलाइदिए । पैदलयात्रुले अकाशेपुलको प्रयोग गरिदिए, सडक विभागले बेला–बेलामा सडकसम्बन्धी काम गरिदिए हामीलाई धेरै सहज हुन्थ्यो ।
प्रस्तुति : रचना श्रेष्ठ / सम्पूर्ण
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)