सरकारमा फोरम सहभागी : पोखरेल र यादव उपप्रधानमन्त्री
![सरकारमा फोरम सहभागी : पोखरेल र यादव उपप्रधानमन्त्री](https://annapurnapost.prixacdn.net/media/albums/health_minister_upendra_yadhav3_20180601153555_t3KqyUxFA0.jpg)
काठमाडौं : प्रधानमन्त्री केपी ओली नेतृत्वको सरकारमा शुक्रबारदेखि फोरम सहभागी भएको छ । संघीय फोरम अध्यक्ष उपेन्द्र यादव उपप्रधान एवं स्वास्थ्य तथा जनसंख्यामन्त्रीको जिम्मेवारीसहित सरकारमा सहभागी भएका छन् । प्रधानमन्त्री ओलीले रक्षामन्त्री ईश्वर पोखरेललाई उपप्रधानमन्त्रीमा बढुवा गरेका छन् । यस्तै प्रधानमन्त्री ओलीले सञ्चार राज्यमन्त्री गोकुल बास्कोटालाई सञ्चार मन्त्रीमा बढुवा गरेका छन् ।
शुक्रबारको विस्तारसँगै प्रधानमन्त्री, दुई उपप्रधानमन्त्री, १८ मन्त्री तथा तीन राज्यमन्त्रीसहित २४ सदस्यीय मन्त्रिमण्डल बनेको छ ।
प्रधानमन्त्रीपछि वरियातामा रक्षामन्त्री पोखरेल दोस्रो र यादव तेस्रो स्थानमा रहने प्रधानमन्त्रीका प्रेस सल्लाहकार डा.कुन्दन अर्यालले जानकारी दिए ।
तत्कालिन प्रधानमन्त्री पुष्पकमल दाहाल नेतृत्वको सरकारमा यादव २०६५ सालमा उपप्रधानसहित परराष्ट्रमन्त्रीको जिम्मेवारीमा थिए ।
ओली आफू प्रधानमन्त्री बनेदेखि नै संघीय फोरमलाई सरकारमा सहभागी गराउन पहल गर्दै आएका थिए । पराराष्ट्र मन्त्रालयमा आँखा लगाएका यादवलाई ओलीले स्वास्थ्य तथा जनसंख्या र शहरी विकास मन्त्रालयमा सहमत गराउन सहमत भएका छन् ।
फोरम नेता मोहम्मद इस्तियाक राइन शहरी विकास मन्त्रालयको जिम्मेवारीसहित सरकारमा सहभागी भएका छन् । बाँकेका राइन मुस्लिम समुदायको प्रतिनिधित्व गर्दै पहिलो पटक मन्त्री भएका हुन् ।
फोरमलाई सरकारमा सहभागी गराउन सोमबार नेकपाका अध्यक्षद्वय ओली र पुष्पकमल दाहालले दुई बुँदे सहमति गरेका थिए ।
फोरम सरकारमा सहभागी भएसँगै वर्तमान सरकारलाई दुई तिहाईभन्दा बढीको बहुमत प्राप्त भएको छ । फोरमसित प्रतिनिधि सभामा १६ सांसद छन् । संविधान संशोधनलगायतका मुद्दामा संसद्मा दुई तिहाइका लागि सत्ता पक्षको मत नै पर्याप्त भएको छ ।
संसदमा सत्तापक्षसँग नेकपाको १७४ र फोरमको १६ गरी १९० मत पुगेको छ । यो कुल मतमा ६९ प्रतिशत हुन्छ । संसद्मा दुई तिहाईका लागि ६६ प्रतिशत मत आवश्यक हुन्छ । २०१५ सालमा विपी नेतृत्वको कांग्रेस सरकारपछि ओली सरकारलाई दुई तिहाई मत प्राप्त भएको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)