‘एरिना बाल्टिक’को नामबाट पनि परिचित छ, कलिनिनग्राद रंगशाला । सन् २०१५ मा शिलान्यास गरिएको यो रंगशालाकोे निर्माण भने सन् २०१६ मा सुरु गरिएको हो । आगामी विश्वकप फुटबललाई ध्यानमा राखेर नै यो रंगशाला निर्माण गरिएको हो । विश्वकपसम्मका लागि यो रंगशालाको दर्शक क्षमता ३५ हजार दुई सय १२ रहनेछ । विश्वकपछि भने यो रंगशालाको दर्शक क्षमता घटाएर २५ हजारमा सीमित गराइनेछ ।
यो रंगशाला बनाउन २५ करोड ७० लाख युरो खर्च भएको छ । यो रंगशालालाई रुसी प्रिमियर लिग क्लब एफसी बाल्टिका कलिनिनग्रादले आफ्नो घरेलु मैदानका रूपमा प्रयोग गर्दै आएको छ । जर्मनीको एलियन्ज एरिनाको नक्साका आधारमा यो रंगशाला तयार पारिएको हो । सन् २००६ मा जर्मनीमा आयोजना भएको विश्वकप फुटबलका केही खेल एलियन्ज रंगशालामा खेलाइएको थियो।
सन् २०१८ को अप्रिल ११ मा कलिनिनग्राद रंगशालामा पहिलो खेल खेलाइएको थियो । यो रंगशाला पोल्यान्डको सीमाभन्दा ४५ किलोमिटर टाढा छ । आगामी जुन १४ देखि सुरु हुने विश्वकप फुटबलका क्रममा यो रंगशालामा समूहगत चरणका चारवटा खेल खेलाइने कार्यक्रम छ । समूहगत चरणमा जुन १६ मा क्रोएसिया र नाइजेरियाबीचको खेल यो रंगशालामा खेलाइनेछ ।
यसैगरी जुन २२ मा सर्विया र स्विट्जरल्यान्डबीचको खेल पनि यही रंगशालामा खेलाइनेछ । यसका अतिरिक्त जुन २५ मा स्पेन र मोरक्को तथा जुन २८ मा इङ्ल्यान्ड र बेल्जियमबीचको समूहगत चरणको खेल पनि यो रंगशालामा खेलाइनेछ ।
प्रतिक्रिया दिनुहोस !
