इङ्लिस क्लब साउथह्याम्पटनबाट व्यावसायिक फुटबल खेल्दै आएका माया योसिदा जापानी टोलीका मुख्य रक्षक हुन् । जापानको पछिल्लो सफलतामा यी खेलाडीको भूमिका महत्वपूर्ण रहँदै आएको छ । सन् २०१२ मा लन्डनमा भएको ओलम्पिक खेलकुदमा जापानको राष्ट्रिय टोलीको कप्तानी गरेका योसिदाले टोलीलाई यसपटक रुस विश्वकपका लागि छनोट गराउन महत्वपूर्ण योगदान पुर्याएका थिए ।
विपक्षी खेलाडीलाई आफ्नो क्षेत्रमा रोक्नमात्रै हैन, आफ्नो क्षेत्रबाट बल अघि बढाउँदै गोलका लागि स्ट्राइकरलाई अवसर सिर्जना गर्न र आफैं गोल गर्नसमेत उनी सक्षम छन् । सन् २०१० यता जापानी टोलीबाट खेल्दै आएका योसदाले अहिलेसम्म ८० खेल खेलेका छन् । त्यसबाट उनले टोलीका लागि १० गोल पनि गरेका छन् । विश्वकै चर्चितमध्येको इङ्लिस प्रिमियर लिगमा साउथह्याम्पटनका लागि मुख्य रक्षकका रूपमा खेल्दै आएका योसिदा टोलीका अनुभवी खेलाडी हुन् ।
उनको यो अनुभव आगामी जुन १९ तारिखमा कोलम्बियाविरुद्धको खेलसँगै जापानले रुस विश्वकपमा आफ्नो दाबेदारी प्रस्तुत गर्दा पनि महत्वपुर्ण हुनेछ । विशेषगरी जापानले रुस विश्वकपका लागि रक्षात्मक रणनीति तय गरेकाले पनि टोलीलाई प्रत्येक खेलमा पराजयबाट जोगाउन र जिततर्फ अग्रसर गराउन उनकै भूमिका मुख्य र निर्णायक हुने पक्का छ ।
प्रशिक्षक अकिरा निसिनोले रुस विश्वकपमा चार रक्षक, दुई विंगर, तीन मिडफिल्डर र एकमात्र स्ट्राइकर खेलाउने रणनीति बनाएका छन् । उनले यसै साता भएको खेलमा घानासँग २-० गोलले पराजित हुँदा पनि यही रणनीति प्रयोग गरेका थिए । त्यसैले यो रणनीतिमा टोलीलाई पराजयबाट जोगाउन उनै योसिदाको भूमिका महत्वपूर्ण हुनेछ ।
प्रतिक्रिया दिनुहोस !
