बार्सेलोना : कातालोनियाका स्वतन्त्रता पक्षधर नेता क्विम तोराले शनिबार नयाँ स्पेनी प्रधानमन्त्री पेद्रो सान्चेजसँग वार्ताका लागि आह्वान गरेका छन्।तोराले भने, ‘प्रधानमन्त्री पेद्रो सान्चेज आउनुस कुरा गरौँ । स्पेन र कातालोनियाबीचको तनावलाई सम्बोधन गरौँ । तपाईं र हामी मिलेर समस्या समाधानका लागि जोखिम उठाऔँ ।’
स्पेनको राजनीतिमा अनुभवी राजनीतिज्ञका रूपमा मानिने नेता मारियानो राखोए विश्वासको मत हासिल गर्न नसकेर पदमुक्त भएका थिए । निवर्तमान प्रधानमन्त्री राखोएविरुद्ध नेता सान्चेजले नै संसद्मा अविश्वासको प्रस्ताव दर्ता गराएका थिए । राखोएले करिब सात वर्ष स्पेनी प्रधानमन्त्रीका रूपमा नेतृत्व सम्हालेका थिए । नयाँ प्रधानमन्त्रीका रूपमा शुक्रबार शपथ लिएका सान्चेजसँग वार्ता सहज हुने विश्वासका साथ कालोनियाको क्षेत्रीय सरकार प्रमुख तोराले वार्ताको प्रस्ताव गरेका हुन् ।
नवनिर्वाचित प्रधानमन्त्री सान्चेज ४६ वर्षीय अर्थशास्त्री हुन् । उनलाई सरकार सञ्चालनको अनुभव भने छैन । स्थानीय समयानुसार उनले बिहान ११ बजे राजा फेलिपे छैटौंको अगाडि माद्रिदमा राजदरबारमा शपथ लिएका थिए । राखोएको पक्षमा १८० मत र विपक्षमा १६९ मत परेको थियो भने एकजना सांसद अनुपस्थित थिए ।
सोसलिस्ट पार्टी, विपक्षी पार्टी पोएदेमोस, स्पेनको कातालान र बास्क्युका क्षेत्रीय पार्टीले पनि पेद्रोलाई मतदान गरेका छन् । उनले आफू वार्तामार्फत नै समस्याको समाधान निकाल्ने पक्षमा रहेको स्पष्ट पार्दै वार्ताका लागि आफू खुला रहेको पनि बाएका छन् ।
स्पेनी प्रधानमन्त्रीले माद्रिदमा शपथ लिएपछि कातालोनियाको स्वतन्त्रताका लागि लड्दै आएको क्षेत्रीय समूहका नेता तोरा नेतृत्वको सरकारले पनि बार्सेलोनामा शनिबार शपथ लिएको जानकारी कातालोनियाली नेताले जानकारी गराएका छन् ।
कातालोनियाली जनताले जनमतसंग्रहमा स्पेनबाट पृथक् हुनका लागि जनमत दिएको भनी कातालोनियाका पूर्वनेता काल्र्स पुग्दमोनको नेतृत्वको सरकार र तत्कालीन क्षेत्रीय संसद्ले गत वर्ष स्पेनबाट स्वतन्त्र भएको घोषणा गरे पनि केन्द्र सरकारले उक्त निर्णयलाई अवैधानिक भन्दै मान्यता दिएको थिएन । स्वतन्त्र भएको घोषणासँगै स्पेनको केन्द्र सरकारले कातालोनियामाथि प्रत्यक्षरूपमा शासन चलाएको थियो । यसै सिलसिलामा क्षेत्रीय सरकारका पूर्वप्रमुख पुग्दमोन लगायतका केही नेता बेल्जियम पलायन भएका थिए ।
पछि डेनमार्कबाट जर्मनी हुँदै बेल्जियम फर्किने क्रममा जर्मनीको राजमार्गमा पक्राउ परेका नेता पुग्दमोनलाई जर्मनीले सुपुर्दगीका लागि आवश्यक प्रक्रिया नपुगेको भन्दै सुपुर्दगी गरिसकेको छैन । केन्द्र सरकारको नेतृत्वमा भएको क्षेत्रीय निर्वाचनमा पनि कातालोनियाको स्वतन्त्रताको पक्षधर समूहलाई नै बहुमत मिलेपछि अहिले तोराको नेतृत्वमा क्षेत्रीय सरकार गठन भएको छ ।
प्रतिक्रिया दिनुहोस !
