सियोल : दक्षिण कोरिया एसियाली क्षेत्रबाट सबैभन्दा बढी विश्वकप फुटबल खेल्ने टोली हो । १०औं सहभागिताका रूपमा रुस विश्वकप खेल्न लागेको दक्षिण कोरिया यो क्षेत्रबाट सबैभन्दा माथिल्लो उपलब्धि हात पार्ने टोली पनि हो ।
दक्षिण कोरियाले सन् २००२ मा जापानसँग मिलेर आफैंले आयोजना गरेको विश्वकप फुटबलमा सेमिफाइनल सम्मको यात्रा तय गरेको थियो । दक्षिण कोरियाबाहेक अहिलेसम्म अन्य कुनै पनि एसियाली टोलीले विश्वकप फुटबलमा सेमिफाइनल सम्मको यात्रा तय गर्न सकेको छैन । सन् २००२ मा फुटबलका ठूला शक्तिराष्ट्रविरुद्ध सनसनीपूर्ण प्रदर्शन गरेको दक्षिण कोरियाले त्यही प्रतियोगितापछि ‘जायन्टकिलर’को छवि बनाएको थियो ।
अमेरिकासँग बराबरी तथा पोल्यान्ड र पोर्चुगललाई पराजित गर्दै समूह ‘डी’को विजेताका रूपमा नकआउट चरण प्रवेश गरेको दक्षिण कोरियाले त्यसपछि पनि सशक्त प्रदर्शन गर्यो । प्रिक्वार्टरफाइनलमा इटालीलाई २-१ ले पराजित गरेको दक्षिण कोरिया क्वार्टरफाइनलमा स्पेनलाई टाइब्रेकरमा ५-३ ले पराजित गर्दै सेमिफाइनलमा पुग्यो । सेमिफाइनलमा भने ओलिभर कानको कप्तानीमा रहेको जर्मनीसँग १-० ले पराजित भएपछि दक्षिण कोरिया त्यसभन्दा अघि बढ्न सकेन । टर्कीसँग पनि ३-२ ले पराजित हुँदा चौथो स्थानमा रोकियो तर दक्षिण कोरिया यो उपलब्धि हात पार्ने पहिलो एसियाली टोली बन्यो ।
यो नतिजा अहिलेसम्म पनि एसियाली टोलीले विश्वकप फुटबलमा हात पारेको ठूलो उपलब्धिका रूपमा रहेको छ । त्यसपछिका खेलमा भने दक्षिण कोरियाले आफ्नो जायन्टकिलरको छवि दोहोर्याउन सकेको छैन । दक्षिण कोरिया सन् २००२ पछि भएका तीन विश्वकपमा लगातार सहभागी हुँदै आइरहेको छ, यद्यपि प्रिक्वार्टरफाइनलभन्दा माथि पुग्न सकेको छैन ।
दक्षिण कोरिया २००६ मा समूह चरण, सन् २०१० मा प्रिक्वार्टरफाइनल र २०१६ मा समूह चरणबाटै बाहिरिएको छ । रुस विश्वकप नजिकिँदै गर्दा दक्षिण कोरियालाई फेरि आफ्नो जायन्टकिलरको छवि फर्काउने अवसर रहेको छ । दक्षिण कोरिया साविक विजेता जर्मनी, मेक्सिको र स्विडेन रहेको समूह ‘एफ’मा परेको छ । मेक्सिको र स्विडेन आफ्नै स्तरका टोली भएकाले दक्षिण कोरियाले यी दुई टोलीलाई पराजित गर्दै रुस विश्वकपको समूह चरण पार गर्न सक्नेछ । युरोपेली लिग फुटबल खेल्ने खेलाडीको बाहुल्य रहेको दक्षिण कोरिया त्यसका लागि सक्षम पनि छ ।
यद्यपि विश्वकप तयारीका लागि खेलिएको पछिल्ला खेलमा बेहोरेको पराजयले भने दक्षिण कोरियालाई केही चिन्ता थपेको छ । गत मे २८ मा खेलिएको मैत्रीपूर्ण खेलमा होन्डुरसलाई २-० ले पराजित गरेको दक्षिण कोरिया गत बिहीबार भएको खेलमा भने बोज्निया हर्जगोभिनासँग ३-१ गोलले पराजित हुन पुग्यो । यो प्रदर्शनबाट सुधार ल्याउन सके दक्षिण कोरियाले विश्वकप फुटबलमा अझ ठूलो उपलब्धि हात पार्न सक्नेछ ।
दक्षिण कोरियाको टोली
गोलरक्षक : किम सेयुंग-ग्यु (भिसेल कोबे), किम जिन-ह्युवन (सेरेजो ओसाका), चो ह्युन-वी (डइगु एफसी)
रक्षक : किम योंग-ज्योन (ग्वान्झाउ इभरग्रान्डी), जाङ ह्युन-सी (एफसी टोक्यो), जुङ सेयुंग-ह्याउन (सगन टोसु), युन योंग-सुन (सेयोंगनाम एफसी), ओ बान-सुक (जेजु युनाइटेड), किम मिन-वी (साङ्जु साङ्मु), पार्क जु-हो (उल्सान हुन्डाई), होङ चुल (साङ्जु साङ्मु), गो यो-हान (एफसी सियोल), ली योंग (जिओनबुक हुन्डाई मोटर्स)
मिडफिल्डर : कि सुंग-योउंग (स्वान्सिया सिटी), जुङ वी-योंग (भिसेल कोबे), जु से-जोंग (एसान मुगुन्ह्वा), को जा-चेवल (एफसी अग्सबर्ग), ली जाई-सुंग (जिओनबुक हुन्डाई मोटर्स), ली सेउङग-वी (हेल्लास भेरोना), मुन सिओन-मिन (इन्चेवन युनाइटेड)
स्ट्राइकर : किम सिन-विक (जिओनबुक हुन्डाई मोटर्स), सोन हेउंग-मिन (टोट्टनहाम हर्टस्पर), ह्वांग ही-चान (एफसी रेड बुल साल्जबर्ग)
प्रशिक्षक : सिन ताई-योंग
दक्षिण कोरियाको खेल
समूह ‘एफ’
जुन १८ : स्विडेनविरुद्ध
जुन २३ : मेक्सिकोविरुद्ध
जुन २७ : जर्मनीविरुद्ध
दक्षिण कोरिया
विश्वकप सहभागिता : १०औं पटक
विश्वकपमा सफलता : चौथो स्थान (२००२)
फिफा वरीयता : ६१
प्रतिक्रिया दिनुहोस !
