दक्षिण कोरिया : विश्वकपमा प्रभाव पार्नसक्ने खेलाडी 'की सुंग-योउंग'

मिडफिल्डर की पछिल्लो केही वर्षयता दक्षिण कोरियाका मुख्य खेलाडी रहँदै आएका छन् । टोलीका कप्तानसमेत रहेका कीले मैदानमा नेतृत्व र खेलाडीको दुवै हैसियतमा महत्र्वपूर्ण योगदान पुर्‍याउँदै आएका छन् । खेलप्रति उनको परिकल्पना, खेल्ने कला, लामो प्रहार र त्यसमा पास निकाल्न सक्ने क्षमताले नै कीलाई टोलीको महत्र्वपूर्ण खेलाडीका रूपमा स्थापित गराएको छ ।

 पछिल्लो ६ सिजन युरोपकै चर्चित घरेलु लिग फुटबल इङ्लिस प्रिमियर लिगमा बिताएका उनको अनुभव र त्यही क्षमताले दक्षिण कोरियालाई रुस विश्वकप फुटबलमा अघि बढाउन मद्दत पुग्नेछ । 

उनी मिडफिल्डबाट गोलका राम्रा अवसर सिर्जना गर्नमात्रै हैन, आवश्यक परेको अवस्थामा आफैं गोल गर्न पनि सक्षम छन् । दक्षिण कोरियाका लागि एक सय खेल खेलिसकेका कीले अहिलेसम्म १० गोल पनि गरेका छन् । राष्ट्रिय टोलीबाट तेस्रो विश्वकप फुटबल खेल्ने तयारीमा जुटेका की यो सहभागितालाई अझ यादगार बनाउन चाहन्छन् । 

आफू उच्च लयमा रहेको तथा खेल जीवनको अन्तिम विश्वकपजस्तै मानिएकाले पनि किले रुस विश्वकपमा मेहनत गर्ने पक्का छ । सन् २०१० मा दक्षिण अफ्रिका तथा सन् २०१४ मा ब्राजिलमा भएको विश्वकप खेलेका की पहिलोपटक विश्वकपमा कप्तानी गर्दैछन् ।