जनकपुरधाम : धनुषाको जनकपुरमा भाडादर तोकिएको भए पनि विद्युतीय (ई) रिक्सा चलाउनेले मनपरी असुल्न थालेका छन् । चोक-चोकमा भाडादर उल्लेख गरिएको होर्डिङ बोर्ड ट्राफिक प्रहरीले राखिदिएको छ तर त्यसको कार्यान्वयन हुन सकेको छैन ।
होर्डिङ बोर्डमा उल्लेख भएअनुसारको भाडामा यात्रु बोक्न रिक्सा चालकले अस्वीकार गर्ने गरेका छन् । तोकिएभन्दा दोब्बर भाडा रिक्सा चालकले असुल्ने गरेको यात्रु बताउँछन् ।
रामानन्द चोकबाट अञ्चल अस्पतालसम्म १० रुपैयाँ भाडा कायम गरिएको छ तर रिक्सा चालकले २० रुपैयाँ लिने गरेका छन् । मुरली चोकमा ड्युटी खटिएका प्रहरीकै अगाडि रिक्सा चालकले यात्रुसँग मोलमोलाइ गर्छन् । मुरली चोकबाट एयरपोर्ट गेटसम्म १५ रुपैयाँ भाडादर कायम गरिए पनि रिक्सा चालकले १ सय रुपैयाँसम्म भाडा लिने गरेको स्थानीय बताउँछन् ।
शिव चोकबाट भानु चोक पुगेकी बर्दिबासकी सुनीता दाहालसँग ज.१ह २६६ नम्बरको रिक्सा चालकले २० रुपैयाँ लिए तर भाडा भने ५ रुपैयाँ मात्र कायम गरिएको छ । नाम बताउन नचाहेका ती चालकले भने, ‘प्रशासनले त्यत्तिकै भाडा कायम गरेको हो । त्यो भाडासँग हाम्रो मतलब छैन ।’
ट्राफिक प्रहरीले हचुवाका भरमा भाडादर कायम गरेको रिक्सा चालक बताउँछन् । भाडादर कायम गरिएपछि रिक्सा चालकले ट्राफिकविरुद्ध आन्दोलित भएका थिए तर कारबाही नगर्ने ट्राफिकको आश्वासनपछि उनीहरू पछि हटेका थिए । एक रिक्सा व्यवसायीले भने, ‘अहिलेसम्म कारबाही गरेको छैन । कारबाही गरे हामी फेरि आन्दोलन गर्छौं ।’ उनका अनुसार तोकिएको भाडा लिएर रिक्सा चलाए खान पनि पुग्दैन ।
जिल्ला ट्राफिक प्रहरी कार्यालय जनकपुरका प्रहरी निरीक्षक अभिनन्दन चौधरीले तोकिएभन्दा बढी भाडा रिक्सा चालकले यात्रुबाट असुल्ने गरेको कुरा थाहा नभएको बताए । ‘अहिलेसम्म एक यात्रुले पनि गुनासो गरेका छैनन्’, उनले भने, ‘गुनासो गरे बढी भाडा असुल्ने चालकलाई कारबाही हुन्छ ।’
प्रमुख जिल्ला अधिकारी, स्थानीय तह र म्याजिक व्यवसायीका प्रतिनिधिको संयुक्त छलफलबाट भाडादर कायम गरिएको उनले जानकारी दिए । भाडादर तोक्दा रिक्सा चालकले आन्दोलन गरेको विषयमा उनले भने, ‘आन्दोलत गरेका थिए तर पछि उनीहरू आफैंले रिक्सा चलाउन थाले ।’ भाडामा सबैको सहमति रहेकाले तल-माथि हुन नसक्ने उल्लेख गर्दै उनले भने, ‘कायम गरिएको भाडा मात्र यात्रुबाट रिक्सा चालकले उठाउन पाउँछन् ।’
जनकपुरमा करिब ४ हजार ई-रिक्सा सञ्चालनमा छ । भाडादर कायम गरिएको करिब महिना बित्यो तर कार्यान्वयन भयो कि भएन भन्नेमा एक दिन पनि अनुगमन भएको छैन । अनुगमन नहुँदा नै रिक्सा चालकले मनपरी तरिकाबाट भाडा असुल्ने गरेको यात्रुको गुनासो छ । प्रशासनले तोकेअनुसार भाडा नदिँदा कतिपय युवालाई रिक्सा चालक गालीगलौज गर्ने मात्र होइन, कुटपिटमै उत्रिने गरेको स्थानीय श्याम साह बताउँछन् ।
जनकपुर उपमहानगरपालिकाका मेयर लालकिशोर साहले भाडा बढी लिने गरेको गुनासो आउने गरेको तर बजार अनुगमन नभएको स्वीकार गरे । तोकिएको भाडादर कायम गराउन ट्राफिक प्रहरीसँग छलफल गर्ने उनको भनाइ छ ।
प्रतिक्रिया दिनुहोस !
