विश्वकप टोलीमा पर्नका लागि अभ्यास र मेहनत गर्नु स्वाभाविक हो । तर, इजिप्टका पूर्वस्ट्राइकर अहमद होसाम हुसैन ‘मिडो’ ले रुस विश्वकप टोलीमा पर्नका लागि आफ्नो ३७ केजी तौल घटाएका छन् । टोट्टनहाम र सेल्टा भिगोका पूर्वस्ट्राइकर मिडोले प्रशिक्षकलाई आफू फेरि खेल्नका लागि फिट भएको भन्दै टोलीमा राख्न आग्रहसमेत गरेका छन् ।
टोलीका प्रभावशाली स्ट्राइकर मोहमद सलाह घाइते भएका कारण प्रशिक्षक हेक्टर कुपर चिञ्चित रहेको अवस्थामा ३५ वर्षीय मिडोले आफू सलाहको स्थानमा खेल्न तयार रहेको खुलासासमेत गरेका छन् ।
भीमकाय शरीर भएका कारण ३५ वर्षीय मिडो ३० वर्षको उमेरमै फुटबल खेलबाट टाढिएका थिए । तर, उनी हाल पनि विभिन्न क्लब र राष्ट्रिय टोलीको व्यवस्थापकका रूपमा सक्रिय छन् । ‘उनले इजिप्टका प्रशिक्षक कुपरलाई ट्विट गर्दै भनेका छन्, ‘मिस्टर कुपर, तपाईंलाई मेरो काउन्टर एट्याक्टको गोल गर्ने क्षमताको विषयमा राम्ररी थाहा छ ।
म अहिले विश्वकप खेल्नका लागि पनि तयार छु । हरेक दुई खेलमा एक गोल गरेरै छाड्ने विश्वास म तपाईंलाई दिलाउन चाहन्छु ।’ इजिष्टका लागि मिडोले यसअघि ५१ खेलमा २० गोलसमेत गरिसकेका छन् । रुस विश्वकपमा अफ्रिकाबाट छनोट भएको इजिप्ट समूह ‘ए’ मा परेको छ ।
प्रतिक्रिया दिनुहोस !
