हवाना : क्युबाको संविधानसभाले नयाँ संविधान निर्माणको प्रक्रिया शुरु गरेको छ । शनिबारदेखि नयाँ संविधान निर्माणकार्य शुरु भएको यहाँको संविधानसभाले जानकारी दिएको छ । हवानामा शनिबार आयोजित संविधानसभाको एक विशेष अधिवेशनले नयाँ संविधान निर्माण प्रयोजनका लागि एक नयाँ मस्यौदा कार्यदल चयन गरेको छ । क्युबाको संविधानसभाका ५ सय ७२ जना सदस्यले शनिबार मतदानमार्फत नै ३३ सदस्यीय नयाँ निर्माण मस्यौदा कार्यदल निर्माण गरेको बताइएको छ ।
क्युबाका पूर्वराष्ट्रपति एवं यहाँको कम्युनिस्ट पार्टीका प्रथम सचिव राउल क्यास्त्रो यस मस्यौदा कार्यदलका प्रमुखका रूपमा निर्वाचित भएका छन् । कार्यदलका उपप्रमुखमा क्युबाका राष्ट्रपति माइगेल दियास क्यानेल निर्वाचित भएको पनि क्युबाको संविधानसभाद्वारा प्रकाशित विज्ञप्तिमा जानकारी दिइएको छ ।
राष्ट्रपति दियासले भने, ‘यस कार्यदलले जतिसक्दो चाँडो नयाँ संविधानको मस्यौदा निर्माण गर्छ र यसलाई अन्तिम निर्णयका लागि जनमत संग्रहमा पनि पठाउन सकिनेछ ।’ क्युबाले सन् २०१० देखि विभिन्न राजनीतिक सुधारका कार्य गरिरहेको छ । राजनीतिमा सुधार र यसका माध्यमबाट दिगो र आर्थिक विकासका विविध प्रयास जारी राखेको छ ।(सिन्ह्वा)
प्रतिक्रिया दिनुहोस !
