विस्ट्लर(क्यानडा): स्टिल र अलुमिनियममा कर लगाउने अमेरिकी सरकारको निर्णयका विरुद्धमा युरोपेली युनियन (इयु) आबद्ध अर्थमन्त्रीहरू एक भएर प्रतिकारमा उत्रिएका छन् ।
उनीहरूले अमेरिकाको उक्त निर्णयको विरोध गर्दै यदि एकतर्फी रूपमा त्यसो गरिए आफ्ना सबै आर्थिक नियम तथा नीतिमा अमेरिकालाई एक्लाएर अघि बढ्ने उनीहरूले स्पष्ट पारेका छन् । यस्तो निर्णय छिटै हुनसक्ने चेतावनी दिँदै अमेरिकालाई त्यसका लागि तयार रहन चेतावनी पनि दिएका छन् । आगामी शुक्रबारदेखि अमेरिकाको उक्त निर्णय कार्यान्वयनमा आउन लागेकाले सो समयअगावै अर्थमन्त्रीहरूको यो चेतावनी आएको हो ।
त्यसअघि जी ७ समूहका अर्थमन्त्रीहरूले अमेरिकालाई दिएको यो चेतावनीलाई अर्थपूर्ण रूपमा लिइएको छ । अमेरिकी विदेशमन्त्री स्टिभ मनुसिनको पनि औद्योगिक राष्ट्रहरूको समूह ‘जी ७’ का अर्थमन्त्रीहरूले आलोचना गरेका छन् । अमेरिकाको उक्त नयाँ कानुनको विषयलाई लिएर मनुसिनले दिएको अभिव्यक्तिको उनीहरूले विरोध गरेका हुन् ।
ती सात देशका अर्थमन्त्रीहरूको क्यानडामा बसेको बैठकपछि शनिबार उनीहरूले यस्तो धारणा राखेका हुन् । बैठकमा उनीहरूले अमेरिकासँग व्यापारयुद्ध नै हुन सक्ने आरोप पनि लगाएका थिए । क्यानडाको विस्ट्लरमा भएको उक्त बैठकमा युरोपेली युनियन आबद्ध देशका साथै क्यानडाले पनि अमेरिकाले यस्तो चेतावनी दिएको छ । उनीहरूले अमेरिकाको उक्त नियमको प्रतिकार गर्ने चेतावनी दिएका छन् । उता फ्रान्सका अर्थमन्त्रीले त अमेरिकासँग आगामी केही दिनमै व्यापारयुद्ध शुरु हुनसक्ने अवस्था रहेको जानकारी दिएका थिए ।
अमेरिकी राष्ट्रपति डोनाल्ड ट्रम्पले भने विगतका कैयौँ वर्षदेखि नै अरू देशहरूले व्यापारका क्षेत्रमा अमेरिकामाथि नै शोषण गरिरहेको दाबी गरेका छन् । राष्ट्रपति ट्रम्पले शनिबार ट्विट गर्दै उक्त करले अमेरिकी स्टिल उत्पादकहरूको पक्षमा काममात्र गर्न खोजेको आरोप लगाएका छन् । यस कानुनले उनीहरूलाई संरक्षण गर्नमात्र खोजेको उनको तर्क थियो । उनले भने, ‘त्यो कानुनले ती वस्तुमा अमेरिकी राष्ट्रिय सुरक्षा गर्ने र उनीहरूको संरक्षण र सहयोगमात्र गर्नेछ । अन्यथा अमेरिका यस क्षेत्रमा विगतको जस्तै शोषित नै भइरहनेछ ।’
राष्ट्रपति ट्रम्पले अमेरिकी उत्पादकहरूले आगामी दिनमा युरोप र अन्यत्र पनि अवरोधको सामना गर्नुपर्ने अवस्था रहेको चर्चा गरे । यस क्षेत्रमा अब अमेरिका पहिलेको तुलनामा चनाखो हुनुपर्ने अवस्था आएको पनि उनले स्पष्ट पारे । विश्वका अरू देशहरूको विरोध आइरहेका बेला उक्त नियमलाई लिएर युरोपेली युनियन आबद्ध अर्थमन्त्रीहरूको यो पछिल्लो र कडा चेतावनी आएको हो ।
यस चेतावनीपछि अमेरिकाका तर्फबाट भने कुनै प्रतिक्रिया आएको छैन । अमेरिकी राष्ट्रपति ट्रम्प र विदेशमन्त्रीका अभिव्यक्तिहरू हेर्दा यो निर्णयबाट अमेरिका पछि हट्नसक्ने अवस्था पनि देखिएको छैन । (एएफपी)
प्रतिक्रिया दिनुहोस !
