काठमाडौं : इराकमा २०६१ भदौ १६ गते १२ जना नेपालीको बिभत्स हत्याको घटनाले विश्वभर तरंग ल्यायो । सोही घटनाबारे अनुसन्धान गरी लन्डनका पत्रकार क्याम सिम्प्सनले पुस्तक लेखे, ‘द गर्ल फ्रम काठमान्डु’ ।यो पुस्तकबारे राजधानीको भृकुटीमण्डपमा जारी अन्तर्राष्ट्रिय पुस्तक प्रदर्शनीमा सोमबार चर्चा भएको छ ।
मण्डला बुक पोइन्टले बजारमा ल्याएको पुस्तकबारे समाजशास्त्री डा. गणेश गुरुङले चर्चा गरे । पीडितको न्यायिक प्रक्रियामा सहयोग गरेका डा. गुरुङले अमेरिकाका विभिन्न अदालत र अधिवक्ताका कार्यालयहरूमा चहार्दाका अनुभूतिहरू सुनाए । १२ जनामध्ये १० जनाले न्याय पाएको बताउँदै उनले वैदेशिक रोजगार क्षेत्रलाई व्यवस्थित गर्नुपर्नेमा जोड दिए ।
पीडितका तर्फबाट मुद्दा लड्ने अमेरिकी अधिवक्ता म्याक ह्यान्डलीले मुद्दा लड्दाका अनुभूति सुनाए । काम गर्न गएका नेपालीको दर्दनाक घटना मिडियामा हेरेपछि आफू सो घटनाको पैरवी गर्न इच्छुक भएको उनले बताए । मुद्दा जितेका १२ परिवारमध्ये १० परिवारलाई क्षतिपूर्ति उपलब्ध गराउन पाउँदा खुसी लागेको बताउँदै उनले भने, ‘१० जनाले न्याय पाउनुभयो, खुसी लागेको छ । तर दुई जनालाई क्षतिपूर्ति दिलाउन सकिएन ।
कानुनअनुसार मृतकका श्रीमती, छोराछोरी वा बाबुआमाले मात्रै क्षतिपूर्ति पाउने व्यवस्था छ । उहाँहरूको कोही नभएकाले क्षतिपूर्ति दिलाउन सकेनौं ।’ उनले इराक घटना पुस्तकका रूपमा पढ्न पाउँदा खुसी लागेको बताए । पुस्तकका लेखक क्याम भने कार्यक्रममा उपस्थित थिएनन् । पुस्तक लन्डनमा विमोचन गरिने बताइएको छ ।
मारिने १२ नेपालीको परिवारको अन्तर्कथा पुस्तकमा समेटिएको छ । ती परिवारमध्ये जितबहादुर थापाकी श्रीमती कमला थापालाई मुख्य पात्रका रूपमा उभ्याइएको छ । कमला थापाले सो घटनाबारे सम्पूर्ण विवरण पुस्तकमा दिएको बताइन् । क्षतिपूर्तिबारे आफू सन्तुष्ट रहेको बताउँदै उनले भनिन्, ‘ढिलै भएपछि क्षतिपूर्ति पाएका छौं । खुसी लागेको छ ।’
मारिने १२ जनामध्ये खोटाङका मंगल लिम्बू र धनुषाका बुधनकुमार साहले क्षतिपूर्ति पाएनन् । उनीहरूका बुवाआमा, श्रीमती र छोराछोरी कोही नभएका कारण क्षतिपूर्ति नपाएको अधिवक्ता म्याकले बताए । बुधनकुमारका दाइ सत्यनारायण साहले भाइको क्षतिपूर्ति नपाएकोमा दुःख व्यक्त गरे । उनले भने, ‘१० धुर जमिन बन्धकी राखेर भाइलाई विदेश पठाइयो । भाइको उतै हत्या भयो । तर, कुनै पनि क्षतिपूर्ति पाएनौं ।’
प्रतिक्रिया दिनुहोस !
