धनगढीः नेपाल कम्युनिष्ट पार्टीको तर्फबाट प्रदेश नम्बर ७ का मुख्यमन्त्री त्रिलोचन भट्टलाई सर्वसम्मत संसदीय दलको नेता चुनिएको छ । नेपाल कम्युनिस्ट पार्टीका स्थायी समिति सदस्यद्वय भीम रावल र लेखराज भट्टको उपस्थितिमा मंगलबार बसेको संसदीय दलको बैठकले भट्टलाई संसदीय दलको नेताचयन गरेको हो ।
त्रिलोचन भट्ट साविकको माओवादी केन्द्रका नेता हुन् । यस्तै बैठकले साविकको एमालेका नेता तथा आन्तरिक मामिला तथा कानुन मन्त्री प्रकाशबहादुर शाहलाई संसदीय दलको उपनेता चुनेको छ । उनी एमालेको तर्फबाट संसदीय दलका नेता थिए ।
बैठकले प्रमुख सचेतकमा साविकको एमालेका नेता तारा लामा तामाङलाई चयन गरेको छ भने सचेतकमा माओवादी केन्द्रका अक्कल रावललाई चयन गरेको छ । प्रमुख सचेतकमा यसअघि लामा नै रहेका थिए ।
एकीकरणपछि नेताद्वय भीम रावल र लेखराज भट्ट धनगढी आएका हुन् । सोमबार मात्रै एकताको सन्देश दिन भेलाको आयोजना गरिएको थियो । नेकपाले १५ दिनभित्र सबै प्रदेश र जिल्ला कमिटीहरुको टुंगो लगाउन कार्यदल गठन गरेर प्रदेश÷प्रदेशमा खटाएको छ । कार्यदलमा दुवै पार्टीका साविकका ईञ्चार्ज र सह ईञ्चार्ज सदस्य छन् ।
एमालेका तत्कालिन प्रदेश ईञ्चार्ज भीम रावल, माओवादी केन्द्रका तत्कालिन ईञ्चार्ज लेखराज भट्ट, एमालेका सह–ईञ्चार्ज कर्णबहादुर थापा र माओवादी केन्द्रका प्रदेश संयोजक लक्ष्मी दत्तजोशी कार्यदलका सदस्य हुन् ।
चार सदस्यीय कार्यदल प्रदेश ७ को प्रदेश कमिटी र जिल्ला कमिटीको पुनर्गठनको तयारीमा लागेको छ । ‘हामीले पार्टीका पुर्व पदाधीकारीहरुसँग छलफल गरिरहेका छौं, दुई तीन दिनमा सकिन्छ, अनि काठमाडौं गएर प्रदेश र जिल्ला कमिटीहरु पुनर्गठन हुनेछन्’ नेकपाका स्थायी कमिटी सदस्य लेखराजभट्टले भने ।
प्रतिक्रिया दिनुहोस !
