एजेन्सी: यही जुन १४ बाट रूसमा शुरू हुन लागेको २१औँ फिफा विश्वकपमा ३२ राष्ट्रका टिम च्याम्पियन बन्न लागि मैदानमा ओर्लिँदैछन् ।
विश्वकपको उपाधि जित्न रुसका ११ सहरमा बनाइएका १२ स्टेडियममा ३२ देश उत्रिन लागेका हुन् । रुसले विश्वकप खेलाउन लागेका स्टेडियममा सबैभन्दा ठुलो लुझ्निकी स्टेडियम रहेको छ भने सबैभन्दा महंगो क्रिस्टोभस्की स्टेडियम रहेको छ । यिनमा अण्डाको आकारको फिस्ट स्टेडियम पनि रहेको छ ।
क्रिस्टोभस्की स्टेडियम बनाउन मात्रै लगभग १८२८५.४७ करोड रुपैयाँ खर्च गरिएको छ । विश्वकपका क्रममा प्रयोग गरिने सबै स्टेडियमलाई बनाउन र पुनर्निर्माणमा लगभग ५,८०३ लाख डलर (करिब ६२४२८.११ करोड रुपैयाँ) खर्च भएको छ । जबकि सन् २०१४ मा ब्राजिलमा ३६,६०० लाख डलर मात्रै खर्च भएको थियो ।
लुझ्निकी स्टेडियममा एकसाथ ८१ हजार दर्शकले विश्कप फुटबल हेर्न पाउनेछन् । रूसको राजधानी मस्कोस्थित लुझ्निकी स्टेडियम देशको सबैभन्दा ठुलो स्टेडियम हो। यसमा एक साथ ८१ हजार दर्शक खेल हेर्न सक्छन् । यसलाई पुनर्निर्माण गर्न मात्रै ४५०९.७१ करोड रुपैयाँ खर्च गरिएको छ । यही स्टेडियममा विश्वकपको उद्घाटन र फाइनल भिडन्त पनि हुनेछ ।
सन् १८५६ मा पहिलो पटक यस मैदानमा फुटबल खेलाइएको थियो । त्यो बेला यसको नाम सेन्ट्रल लेनिन स्टेडियम राखिएको थियो । सन् १९९२ मा यसको नाम फेरेर लुझ्निकी स्टेडियम कायम गरियो । सन् १९६३ मा सोभियत युनियन र इटलीबीच भएको खेलमा १ लाख २ हजार ५ सय ३८ दर्शक उपस्थित भएका थिए ।
स्पेसशिप आकारमा क्रिस्टोव्स्की
सेन्ट पिटर्सबर्गस्थित क्रिस्टोभ्स्की स्टेडियमलाई स्पेसशिप आकारमा बनाइएको छ । यसको निर्माणमा लगभग १८२५८.२५ करोड रुपैयाँ खर्च गरिएको छ । यस स्टेडियम रोचक कुरा भनेको यसको भित्रको तापक्रम सदैव १५ डिग्री सेल्सियस रहिरहन्छ । यो विश्वकै सबैभन्दा महंगो फुटबल स्टेडियम हो ।
क्रिस्टोभ्स्स्की स्टेडियमको क्षमता ६७ हजार रहेको छ । रसियन प्रिमियर लिगका क्रममा यसमा ५६,१९६ दर्शकले एकसाथ फुटबल हेरेका थिए । विश्वकपका लागि यसको दर्शक क्षमता करिब १२ हजार बढाइएको हो । यसको निर्माण कार्य सन् २००७ बाट सुरु गरेर सन् २०१७ मा पुरा भएको हो ।
स्टेडियमबाट काला सागर
सोचीस्थित फिस्ट स्टेडियम विन्टर ओलम्पिकसँगै फिफा विश्वकपको आयोजना गर्ने विश्वको दोस्रो स्टेडियम भएको छ । यसको पुनर्निर्माणमा ८३६६.०३ करोड रुपैयाँ खर्च गरिएको छ । यो फाइबर अण्डाको आकारमा बनाइएको छ । यसको दक्षिणमा काला सागर र उत्तरमा फिस्ट पहाड रहेको छ। दक्षिणी स्ट्यान्डबाट काला सागर देख्न सकिन्छ ।
विश्वकपका लागि यस स्टेडियमको दर्शक क्षमता ४१,२२० बनाइएको छ । विश्वकप सकिएपछि यस स्टेडियमबाट वैकल्पिक सिट हटाइनेछ । त्यसपछि यसको क्षमता ४० हजार नै हुनेछ ।
दुई स्टेडियमको मात्रै ४० हजार भन्दा कम क्षमता
विश्वकपका लागि निर्माण गरिएका सबै स्टेडियममध्ये केवल दुई कलिनिग्राद स्टेडियम (३५,२१२) र एकटरिनबर्ग स्टेडियम (३५,६९६) को क्षमता ४० हजार भन्दा तल रहेको छ । यी दुवैका अलावा सबै १० स्टेडियम ४० हजार भन्दा धेरै दर्शक क्षमताका छन् । क्रिस्टोब्स्की स्टेडियमको पुनर्निर्माणमा रुसले एक अर्ब ८२ करोड ५७ लाख रुपैयाँ भन्दा धेरै लगानी गरेको छ ।
कुन स्टेडियम कस्तो ?
| नाम | दर्शक क्षमता | निर्माण-पुनर्निर्माण खर्च |
| कजान एरिना | ४५३७८ | ४३९.७ मिलियन डलर |
| एक्टोरिनबर्ग एरिना | ३५,६९६ | २१५ मिलियन डलर |
| फिस्ट स्टेडियम | ४७,६५९ | ७७० मिलियन डलर |
| कालिनिग्राद स्टेडियम | ३५,२१२ | ३०० मिलियन डलर |
| स्पार्टक स्टेडियम | ४५,३६० | ४३० मिलियन डलर |
| लुझ्निकी स्टेडियम | ८१,००० | ४२० मिलियन डलर |
| नोभगोरोद स्टेडियम | ४४,८९९ | २९० मिलियन डलर |
| रोस्तोभ स्टेडियम | ४५,१४५ | ३३० मिलियम डलर |
| क्रिस्टोभस्की स्टेडियम | ६७,००० | १.७ बिलियन डलर |
| मोरदोभिया एरिना | ४४,४४२ | ३०० मिलियन डलर |
| कोसमोस एरिना | ४४,८०७ | ३२० मिलियन डलर |
| भोल्गोग्राद एरिना | ४५,५६८ | २८० मिलियन डलर |
प्रतिक्रिया दिनुहोस !
