प्रिटोरिया : चीनका विदेशमन्त्री वाङ यीले चीन र भारतबीच थुप्रै विषयमा आम सहमति भएको बताएका छन् । ब्रिक्सको मन्त्रीस्तरीय सम्मेलनमा बोल्दै वाङले यस्तो खुलासा गरेका हुन् ।
उनले भारतीय समकक्षी सुषमा स्वराजसँग केही असहमति भए पनि अधिकांशमा सहमति भएको बताएका हुन् । स्वराज र वाङ ब्रिक्स (ब्राजिल, रूस, भारत, चीन र दक्षिण अफ्रिका)का विदेशमन्त्रीको बैठकमा सहभागी थिए । बैठकका क्रममा दुवै नेताले द्विपक्षीय र बहुपक्षीय सहयोग कायम राख्ने चर्चा पनि गरेका छन् । भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङबीच वुहानमा अनौपचारिक बैठक भएको एक महिनापछि ब्रिक्स सम्मेलनको बैठक बसेको हो । चीनको सरकारी समाचार संस्था सिन्ह्वाले विदेशमन्त्री वाङलाई उद्धृत गर्दै भनेको छ, ‘चीन र भारतका व्यापक साझा हित छन् ।’
चिनियाँ विदेशमन्त्री वाङले चीन र भारतबीचको सहकार्यबाट दुवै देशको विकास हुने उनले स्पष्ट पारेका छन् । यसबाट पूरै संसार लाभान्वित र मानव सभ्यताको प्रगतिमा योगदान हुने वाङको तर्क छ । उनले चीन र भारतका नेताबीच भएको सहमतिअनुसार सीमावर्ती इलाकामा शान्ति एवं स्थिरता कायम गरिने खाबी गरेका छन् । चीन र भारत दुवैले आपसी तालमेल गरेर ब्रिक्स संगठन, सांघाई सहयोग संगठन (एससीओ) र अन्य बहुपक्षीय मञ्चमा रचनात्मक भूमिका खेल्नुपर्ने वाङको आग्रह छ ।
चीन–भारतबीच सुमधुर सम्बन्ध बन्दै ः भारत
बेइजिङ ः चीन र भारतबीच सीमा विवाद भए पनि निरन्तर मजबुत सम्बन्ध विस्तार भएको चीनका लागि भारतीय राजदूत गौतम बम्बालले बताएका छन् । डोकलाम विवाद देखा परे पनि त्यस्तो नहुने उनले बताएका छन् ।
केही विषमा सामान्य मतभेद भए पनि त्यसले अब बखेडा खडा नगर्ने उनको भनाइ छ । दुवैको लक्ष्य विकास भएकाले सीमा क्षेत्रमा तनाव भए पनि शान्तिपूर्ण समाधान निकालेको गौतमले स्पष्ट पारे । दुवै देश मिलेर लगातार प्रगति र समृद्धिका लागि काम गर्ने यनको भनाइ छ । भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङबीच द्विपक्षीय वार्तापूर्व चिनियाँ सरकारी टेलिभिजन सीसीटीभीलाई दिएको अन्तर्वार्तामा राजदूत गौतमको भनाइ आएको हो ।
मोदी पुनः शनिवार चीन भ्रमण गर्दै छन् । उनले वुहानमा मोदी र सीबीचको भेटवार्तालाई दुई देशका नेताबीचको ‘रणनीतिक संवाद’ भएको खुलासा गरेका छन् । दुई नेताबीच केही सहमति भएको बताउँदै भारत र चीन प्रगति र आर्थिक विकासमा आपसी सहयोग गर्न तयार भएको उनको भनाइ छ । त्यसैगरी भारत र चीनबीच मतभेदभन्दा निकै समानता भएको उनले बताएका छन् ।
सांघाई सहयोग संगठनमा गत वर्ष भारत र पाकिस्तानलाई औपचारिक रूपमा सहभागी गराइएको थियो । क्विङताओमा आयोजना हुने सम्मेलनले मतभेद बिर्सेर एक साथ काम गर्ने सन्देश आउने उनले बताए ।
प्रतिक्रिया दिनुहोस !
