स्याङ्जा : ६ वर्षअघि खसेको लौझाको पहिरो हटाएर सडक सञ्चालनमा ल्याइएको छ । स्याङजा गल्याङ् जिरोदेखि गुल्मीको रुद्रबेणीसम्मको करिब ३५ किलोमीटर सडक खण्ड लौझा भीरमा खसेको पहिराले ६ वर्षदेखि अवरुद्ध थियो । पहिरोका कारण आवतजावत ठप्प थियो । कालीगण्डकी गाउँपालिका वाड नं २ आलमदेवीस्थित लोैझामा पहिरो जाँदा त्यसबेला कालीगण्डकी नदी थुनिएर ताल बनेको थियो ।
स्थानीय र सुरक्षा निकायको पहलमा थुनिएकोस्थल २ दिनपछि खुलाइएको थियो । दैनिक ५÷७ जना सेना र अन्य २०÷२५ जना कामदारले नियमित काम गरेका थिए । सेनाले पहिरो पन्छाएर आवत जावतका लागि सहज बनाएपछि अहिले पर्खाल लगाउनुका साथै ग्वाबिन तार भर्ने काम भइरहेको छ । पहिरो पन्छाउने काम सुरु भएको ५ महिनापछि यातायात सञ्चालनमा आएको हो । सामान्य ट्रयाक खोल्न पनि ५ महिना लागेको हो । अहिले दुबैतर्फबाट यातायातका साधन गुड्न सक्ने अवस्था छ ।
२०६९ साल भदौमा गएको पहिरो नेपाली सेनाले ६ महिना लगाएर पन्छाएपछि स्थानीयवासी हर्षित बनेका छन् । पटक पटक अन्य ठेकेदारलाई जिम्मा दिँदा पनि काम सम्पन्न हुन नसकेपछि सेनालाई सडक निर्माणको जिम्मा दिएको निर्माण कार्यदलका अवकाश प्राप्त प्रमुख सेनानी रेश्मीराज भट्टराईले बताए । कठिन भौगोलिक अवस्था अनि कडा चट्टान भएकाले पहिरो नियन्त्रण गर्न बायो इन्जिनियरिङ पद्धति प्रयोग गरिएको हो ।
पहिरोका कारण घाँस, दाउरा, डिँडडुल गर्न कठिन भएको थियो । करिब २० मिनेटको यात्रा माथिल्लो बाटोबाट घुमेर जाँदा २ घण्टा भन्दा बढी लाग्ने गर्दथ्यो । अत्यन्त कठिन तथा जोखिमयुक्त काम सेनाले सम्पन्न गरेकोमा गाउँपालिकाका अध्यक्ष खिम थापा दंग भएका छन् । सयौं सवारी साधन र यात्रुले सहज रुपमा यात्रा गर्न पाएका छन् ।
सडक सञ्चालन भएसँगै प्रसिद्ध आलमदेवीको मन्दिरको दर्शन गर्न आउने पर्यटक, कालीगण्डकी गाउँपालिकाका र पाल्पाको सत्यवती गाउँपालिकाका स्थानीयबासी प्रत्यक्ष लाभान्वित हुने प्रमुख प्रशासकीय अधिकृत गणेश पौडेलले बताए । ढिलैभए पनि सेनाले जिम्मा लिएर समयमा ठूलो पहिरो पन्छाएकोमा गाउँपालिकाका स्थानीयबासी हर्षित भएका छन् ।
आलमदेवी शाह बंशको उद्गमथलो अर्थात राजपरिवारको कुलदेवताको मन्दिर हो । धर्मकर्मका लागि बाहै्र महिना यहाँ आउने दर्शनार्थीको घुइचो लाग्ने गर्छ । प्राकृतिक तथा धार्मिक पर्यटनमा समेत आलमदेवीको महिमा छ । शक्तिशाली र मनोकांक्षा पूरा हुने भन्दै आलमदेवीको दर्शन गर्न र भाकल पूरा भएको भन्दै आउने भक्तजन सयौंका संख्यामा हुन्छ । वडादशैंको नवदुर्गाका दिन पारेर पूर्वराजपरिवारका कोही न कोही सदस्य यस मन्दिरमा पूजा गर्न वर्षेनी आउने गरेका छन् । वर्षेनी हजारौं व्यक्ति धार्मिक तथा पर्यटकीय क्षेत्रको अध्ययन तथा अवलोकन गर्न आन्तरिक तथा वाह्य पर्यटक आउने गर्दछन् ।
प्रतिक्रिया दिनुहोस !
