बेल्जियमका विश्वकपमा प्रभाव पार्न सक्ने खेलाडी 'इडेन हाजार्ड'

टोलीका कप्तानसमेत रहेका हाजार्ड बेल्जियमको महत्वपूर्ण खेलाडी हुन् । तीव्रगति, बलसँग खेल्न सक्ने कला तथा नियमित गोल गरिरहने र सहकर्मीलाई पनि गोलको अवसर सिर्जना गर्ने क्षमताले नै हाजार्डलाई बेल्जियम राष्ट्रिय टोलीका लागि मात्रै हैन, युरोपियन क्लबहरूका लागि पनि पहिलो रोजाइको फुटबलरको रूपमा स्थापित गराएको छ । इङ्लिस क्लब चेल्सीबाट व्यावसायिक फुटबल खेल्दै आइरहेका हाजार्ड युरोपकै उत्कृष्ट स्ट्राइकरका रूपमा दरिएका छन् ।

 फ्रान्सेली क्लब लिल्लेको एकेडेमीमा हुर्किएका हाजार्ड लिल्लेको सिनियर टोलीबाट आठ वर्ष खेलेपछि चेल्सीसँग आबद्ध भएका हुन् । उनले यो दुवै क्लबबाट ठूला सफलता हात पारेका छन् । बेल्जियमको सिनियर राष्ट्रिय टोलीबाट उनले यो सफलताको अनुभव गर्न पाएका छैनन् । त्यसैले रुस विश्वकप फुटबलमा बेल्जियमलाई यही सफलतातर्फ अघि बढाउन उनले गर्ने प्रयास साँच्चिकै हेर्न लायकको हुनेछ । 

आक्रामक मिडफिल्डर, वाइड मिडफिल्डर र स्ट्राइकरको कुनै पनि भूमिकामा खेल्न सक्ने हाजार्ड बेल्जियमको राष्ट्रिय टोलीका नियमित सदस्य हुन् । सन् २००८ मा राष्ट्रिय टोलीमा डेब्यु गरेका हाजार्डले टोलीका लागि ८५ खेलबाट २२ गोल गरेका छन् । हाजार्डको उपस्थितिमा टोलीले एकभन्दा बढी फाइदा लिन सक्नेछ ।

 उनी कप्तानको हैसियतमा मैदानमा टोलीको नेतृत्व गर्ने मात्रै हैन, गोल गर्ने र सहकर्मीलाई गोलको अवसर पनि सिर्जना गर्ने गर्छन् । बेल्जियमलाई रुस विश्वकपसम्म पुर्‍याउन पनि उनको यस्तै भूमिका रह्यो । छनोट प्रतियोगितामा उनले ६ गोल गर्दै थप पाँच गोलको अवसर सिर्जना गरेका थिए ।