काठमाडौँः कृषि, भूमि व्यवस्था तथा सहकारी मन्त्री चक्रपाणि खनालले सहकारीलाई कृषि, पर्यटन र उर्जामा लगानी गर्न आग्रह गरेका छन् ।
नेपाल बचत तथा ऋण केन्द्रीय सहकारी संघ (नेफ्स्कुन) र कृषि सहकारी तथा गरिबी निवारण मन्त्रालयको संयुक्त आयोजनामा भएको तेस्रो साकोस शिखर गोष्ठी समापन समारोहमा शुक्रबार बोल्ने क्रममा उनले सहकारीबाट उत्पादन सुनिश्चित अहिलेको आवश्यकता भएको भन्दै सहकारीले प्रर्याप्त मात्रामा उद्यमशीलता र रोजगारी सिर्जना गर्न नसकेको बताए ।
६६ प्रतिशत कृषिमा निर्भर रहेको जनशक्तिले गरेको उत्पादनबाट ६० प्रतिशत जनसंख्यालाई खान नपुग्ने भन्दै खनालले सहकारीलाई व्यवसायिक बन्न आग्रह गरे । कृषिमा गरिएको लगानी र संरचनागत परिवर्तन नगर्दासम्म कृषिमा आत्मनिर्भर सम्भव नभएको उनको भनाई थियो ।
खाडी मुलुकका २८ लाख युवा तथा स्वदेशमा रहेका बेरोजगार युवालाई परिचालन गर्ने गरी सहकारी तथा राज्य मिलेर बृहत् कृषि योजना ल्याउनुपर्ने उनले बताए । सरकारको मुख्य एजेन्डा आर्थिक समृद्वि भएको भन्दै मन्त्री खनालले आर्थिक विकास र सुशासनमा केन्द्रित भएर उत्पादनमा प्राथमिकता दिनुपर्ने उनले बताए ।
कृषि र पर्यटनमा सहकारीले उल्लेख्य योगदान गर्न सक्ने उनले विश्वास व्यक्त गरे । ऊर्जा क्षेत्रमा वैदेशिक लगानी भित्राउन सके दु्रतगतिमा आर्थिक विकास गर्न सकिने उनको भनाइ थियो ।
सहकारी ऐन अनुरुप बजेटले सम्बोधन गर्न नसकेकोमा मन्त्री खनालले भने, ‘करमा कस्न र फुकाउन सक्नुपर्छ ।’ सहकारीकर्मीका गुनासा आएपछि कार्यदलबाट करबारे सम्बोधन हुन सक्ने विश्वास व्यक्त गरे ।
नियमावली र ऐनले सहकारीलाई लगानीमा प्राथमिकता दिन नसकेको भए अझै सहजीकरण गर्न सकिने उनले बताए । ‘ऐनले अंकुश लगाएको छ, त्यसमा छलफल गर्न सकिन्छ’, उनले भने । युवाले पठाएको रेमिट्यान्सलाई विलाशीतामा नभई उत्पादनमा लगाउनुपर्ने उनको भनाइ थियो । कार्यक्रममा नेफ्स्कुनका अध्यक्ष डीबी बस्नेत, महासचिव चन्द्रप्रसाद ढकाल, कोषाध्यक्ष केशव पोखरेललगायतले बोलेका थिए ।
दुई दिनसम्म चलेको गोष्ठीमा देशभरबाट ६ सय भन्दा बढी सहकारीकर्मी र अन्तर्राष्ट्रिय विज्ञहरुको सहभागिता थियो । गोष्ठीमा ११ वटा विभिन्न विषयमा कार्यपत्र प्रस्तुती तथा छलफल भएको थियो । नेफ्स्कूनले प्रत्येक तीन÷तीन वर्षमा यस्तो गोष्ठी गर्दै आएको छ ।
प्रतिक्रिया दिनुहोस !
