नेपालगन्ज : बाँकेको राप्ती सोनारी गाउँपालिका-७ का स्थानीयले राप्ती नदीबाट अवैध रुपमा ढुंगागिट्टी र बालुवा उत्खनन् गर्दै गर्दा तीन एक्जाभेटरसहित २० ट्रिपर प्रहरीले नियन्त्रणमा लिएको छ।
स्थानीयको व्यापक गुनासो आएपछि दिउँसोदेखि प्रहरीले नदीमै पसेर उत्खननमा रोक लगाइएको थियो। गणपति कन्ट्रक्सन र आशिषकुमार श्रेष्ठ जेभीले रातिको समयमा एक्जाभेटर प्रयोग गरी उत्खनन् गर्न थालेपछि शनिबार राती १२ बजेतिर राप्ती सोनारी-७ का वडा अध्यक्ष राम लखन थारु नेतृत्वमा स्थानीयले प्रहरी गुहारेका थिए।
प्रहरीले गणपतिका दुई एक्जाभेटरका साथै ११ ट्रिपर र आशिषकुमार श्रेष्ठ जेभीको एक एक्जाभेटर र ९ ट्रिपरको साँचो नियन्त्रणमा लिएको थियो। गणपतिले राष्ट्रिय गौरवको आयोजना हुलाकी सडक आयोजना र आशिषकुमार श्रेष्ठ जेभीले नेपालगन्ज उपमहानगरपालिकाभित्र ३० किलोमिटर सडक र ४० किलोमिटर नाला निर्माणको काम गरिरहेका छन्।
स्थानीय र कन्ट्रक्सन व्यवसायीबीच रातको समयमा ढुंगा, बालुवा र गिट्टी ढुवानी नगर्ने सहमति भएपछि आइतबार बिहान १० बजेतिर अस्थायी प्रहरी चौकी खल्लाटपरीका प्रहरी सहायक निरीक्षक मोहन केसीले एक्जाभेटर र ट्रिपरको साँचो फिर्ता गरेको बताए।
दुबै कन्ट्रक्सनले जिल्ला समन्वय समिति बाँकेबाट ढुंगा, गिट्टी र बालुवा उत्खननका लागि अनुमति लिएका छन् तर नदीभित्रै एक्जाभेटर प्रयोग गरी उत्खनन् गर्न नपाइने कानुनी व्यवस्था रहेको छ।
प्रतिक्रिया दिनुहोस !
