काठमाडौं : सरकारले केही समयअघि लागू गरेको मर्यादाक्रमका विषयमा जनप्रतिनिधि र कर्मचारीबीच विवाद देखिएको छ । नगरपालिका, गाउँपालिका तथा प्रदेशका मन्त्रालय र निकायमा जनप्रतिनिधि र कर्मचारीबीच मर्यादाक्रममा विवाद बढेपछि सरकारले मर्यादाक्रम संशोधनको गृहकार्य थालेको हो ।
शेरबहादुुर देउवा नेतृत्वको तत्कालीन सरकारले अघिल्लो वर्षको २६ माघदेखि राष्ट्रिय जीवनका विभिन्न क्षेत्रमा रहेका व्यक्तित्वको मर्यादाक्रम लागू गरेको थियो । सो मर्यादाक्रमले आफूहरूको अपमान गरेको जनप्रतिनिधिले गुुनासो गर्दै आएका छन् ।
केही दिनअघि दाङको घोराही उपमहानगरपालिकाका कार्यकारी अधिकृत चक्रपाणी पाण्डेले उपमेयरभन्दा अगाडि आफू रहने भन्दै कार्यक्रममै विवाद गरेका थिए । सरकारले लागू गरेको मर्यादाक्रममा उपमहानगरपालिकाका कार्यकारी अधिकृतका रूपमा रहने सहसचिव उपमेयरभन्दा माथि पर्छन् । यस्तै, अन्य कतिपय पदमा पनि जनप्रतिनिधिभन्दा कर्मचारी मर्यादाक्रममा माथि राखिएपछि समस्या हुँुदै आएको छ ।
मर्यादाक्रममा महानगरपालिकाका मेयरलाई प्रमुुख प्रशासकीय अधिकृतका रूपमा रहने सरकारको सचिवभन्दा पछि राखिएको छ । विश्वका प्रायः सबै देशमा महानगरपालिकाका मेयरलाई सचिवभन्दा माथि राखिने प्रचलन छ । नेपालमा भने त्यसको उल्टो भएकाले समस्या भइरहेको संघीय मामिला तथा सामान्य प्रशासन मन्त्रालयले जनाएको छ । संघीय मामिला तथा सामान्य प्रशासन मन्त्रालयका प्रवक्ता सहसचिव सुुरेश अधिकारीले कर्मचारीभन्दा जनप्रतिनिधि नै मर्यादाक्रममा माथि रहने गरी मर्यादाक्रममा संशोधन आवश्यक रहेको बताए ।
मर्यादाक्रममा भएका गल्ती र समस्याबारे मन्त्रिपरिषद्मा छलफल थालिएको छ, छिट्ट संशोधन गरिनेछ ः लालबाबु पण्डित, संघीय मामिलामन्त्री
मर्यादाक्रममा प्रदेश सरकारका राज्यमन्त्री, प्रदेशका उपसभामुुख, उच्च अदालतका न्यायधीश, प्रदेश लोकसेवा आयोगका अध्यक्षलगायतलाई समेत सचिवका रूपमा रहने कर्मचारीभन्दा तल राखिएको छ । यी सबै विषयमा संशोधन जरुरी रहेको संघीय मामिला मन्त्रालयका प्रवक्ता अधिकारीले बताए । अधिकारीका अनुुसार विभिन्न जिल्लाका जनप्रतिनिधिले मन्त्रालयमा आएर मर्यादाक्रममा आफूहरूलाई अन्याय गरिएको भन्दै गुुनासो गर्ने क्रम पछिल्लो दिनमा बढेको छ ।
अघिल्लो सरकारले हचुुवाका आधारमा मर्यादाक्रम निर्धारण गरेको भन्दै जनप्रतिनिधिले संघीय मामिलामन्त्री लालबाबुु पण्डितसँग गुुनासो गर्दै सच्याउन माग गर्ने गरेका छन् । संघीय मामिलामन्त्री पण्डितले मर्यादाक्रममा भएका त्रुटिबारे मन्त्रिपरिषद्मा छलफल थालिएको जानकारी दिए । ‘मर्यादाक्रममा भएका गल्ती र समस्याबारे मन्त्रिपरिषद्मा छलफल थालिएको छ, सम्भवतः छिट्टै संशोधन गरिनेछ’, मन्त्री पण्डितले भने ।
प्रतिक्रिया दिनुहोस !
