बुटवल : प्रदेश ५ सरकारले आगामी आर्थिक वर्षका लागि शुक्रबार बजेट ल्याउदैछ । सरकार गठन भएको पाँच महिनाभित्र दोस्रोे बजेट ल्याउन लागेको हो । प्रदेश ५ मा करिव ३० अर्बको बजेट आउने सरकारले जनाएको छ । बुधबारमात्रै संसदबाट पारित नीति कार्यक्रममै रहेर बजेट आउने सरकारका प्रवक्ता बैजनाथ चौधरीले बताए । संघीय सरकारको समानीकरण तथा ससर्त अनुदान, चालु आवको सञ्चित रकम तथा आन्तरिक राजश्व संकलनको लक्ष्यसहितको बजेट मुख्यमन्त्री तथा आर्थिक मामिला तथा योजनामन्त्री शंकर पोखरेलले प्रस्तुत गर्नेछन् ।
बजेट प्रस्तुतका लागि शुक्रबार दिउसो एक बजे बैठक बोलाइएको छ । त्यसअघि बस्ने मन्त्रीपरिषद बैठकले बजेट पारित गर्नेछ । बजेटमा सबभन्दा धेरै रकम सडक निर्माणमा छुट्याइएको भौतिक पूर्वाधार विकास मन्त्री समेत रहेका प्रवक्ता चौधरीले बताए । सरकारले हरेक स्थानीय तहका मुकामसम्म दुई लेनको सडक निर्माण गर्ने नीति लिएको छ । जस अनुरुप बजेटमा १ सय ८३ सडक निर्माणका लागि बजेट बिनियोजन भएको छ ।
नीति कार्यक्रममा नारासहित ल्याइएको ‘एक घर एक धारा’ कार्यक्रम पनि बजेटको प्राथमिकतामा परेको छ । प्रदेश ५ का १२ जिल्लाका सदरमुकाममा खानेपानी संकट छ । शहर र ग्रामिण क्षेत्रमा खानेपानीको पहुच पुर्याउन बजेटको दोस्रो प्राथमिकतामा खानेपानी परेको प्रवक्ता चौधरीले बताए । कृषि, पर्यटन त्यसपछिका प्राथमिकतामा परेका छन् । पर्यटनका लागि प्रदेश सरकारले सामान्य बजेट बिनियोजन गरेको छ । संघीय सरकारको सहयोग बिना पर्यटनको विकास सम्भब नभएको भन्दै बजेटमा कम प्राथमिकता दिइएको बताइएको छ ।
बजेटमा करिव १ हजार ६ सय योजना समावेश हुने योजना आयोगका उपाध्यक्ष प्रकाश कुमार श्रेष्ठले जानकारी दिए । मुख्यमन्त्री ग्रामिण विकास कार्यक्रम, ग्रामिण विद्युतीकरण, जलविद्युत क्षेत्रको विकासलाई पनि बजेटले सम्बोधन गर्ने श्रेष्ठले बताए । बजेटमा सांसदले रोजेका दुई योजनामा समेत बजेट बिनियोजन गरिएको बताइएको छ । संसदले निर्वाचन क्षेत्र विकास कोषको माग गरेका थिए । तर सरकारले दुई योजना दिने नीति अवलम्बन गरेको छ ।
समृद्ध प्रदेश, खुसी जनता कार्यक्रमको आधार बनाउने गरी बजेट आउने सरकारले जनाएको छ । बजेटले सबै क्षेत्रलाई समेटे पनि सडक, खानेपानीको पूर्वाधार विकासमा केन्द्रीत भएको हो । ‘आठ–नौ घण्टा पानी बोक्ने बाध्यता हटाउनु सरकारको प्रमुख दायित्व हो, प्रवक्ता चौधरीले भने–‘त्यसैले प्राथमिकतामा राखिएको छ ।’ प्रदेश सरकार आफैले सवा दुई अर्व राजश्व संकलन लक्ष्य राखेको छ । सवारी, मनो।रञ्जन लगायतका करको दर समेत शुक्रबार आउने बजेटले निर्धारण गर्नेछ । त्यससम्बन्धी बिधेयक संसदले पारित गरिसकेको छ । राजश्व संकलन तथा वित्त व्यवस्थापन सम्बन्धी दुई बिधेयकहरु प्रदेश प्रमुख उमाकान्त झाबाट प्रमाणिकरण भएका छन् ।
प्रतिक्रिया दिनुहोस !
