वीरगन्ज : पर्साको धोबिनी गाउँपालिका–३ हरिहरपुरमा एक महिला र उनकी तीन महिने छोरीलाई जल्दै गरेको अवस्थामा उद्धार गरिएको छ ।
स्थानीय सन्जयकुमार साहकी पत्नी सन्जु देवी र उनकी तीन महिनाकी छोरीलाई शुक्रबार बिहान आफ्नै घरबाट आगोले जल्दै गरेको अवस्थामा छिमेकीले उद्धार गरेका हुन् ।
उद्धार गरिएका आमाछोरी दुवैको अवस्था गम्भीर छ । उनीहरूलाई उपचारका लागि वीरगन्जस्थित नारायणी उपक्षेत्रीय अस्पतालमा ल्याइएको थियो । यहाँ उपचार हुन नसकेपछि आमाछोरी दुवैलाई शुक्रबारै काठमाडौं लगिएको छ ।
उनीहरूको काठमाडौं कीर्तिपुरमा रहेको बर्निङ सेन्टरमा उपचार भइरहेको पर्साका प्रहरी नायब उपरीक्षक राजन लिम्बूले जानकारी दिए ।
लिम्बुका अनुसार सन्जु देवीको घाँटीमा धारिलो वस्तुले काटेको सामान्य घाउ देखिनुका साथै उनको छाती, गाला र दुवै हातमा आगोले पोलेको छ । उनकी छोरीको पनि घाँटीमा ब्लेडले चिरेको घाउका साथै दाहिने हातमा पोलेको घाउ छ । आमाभन्दा छोरीको अवस्था बढी गम्भीर रहेको प्रहरी नायब उपरीक्षक लिम्बूले बताए ।
घाइते सन्जु देवीले घरायसी विवादमा ससुरा लक्ष्मीप्रसाद साहले आफ्नो र छोरीको जीउमा आगो लगाएर हत्या गर्ने प्रयास गरेको आरोप लगाएकी छन् ।
प्रारम्भिक बयानमा उनले ससुराले आफू र छोरीलाई कुटपिट गर्दै जीउमा आगो लगाएर हत्या गर्ने प्रयास गरेको भनेर आरोप लगाएको प्रहरी नायब उपरीक्षक लिम्बूले जानकारी दिए ।
म आफनो विस्तारामा सुतिरहेका बेला शुक्रबार बिहान तीन चार बजे तिर अचानक आएका ससुराले कुटपिट गर्दै मेरो र छोरीको जीउमा आगो लगाएर मार्ने प्रयास गरेका हुन् , घाइते महिला सन्जु देवीको भनाइ उधृत गर्दै प्रहरी नायव उपरिक्षक लिम्बुले भने ।
सन्जुका सासुससुरा र देवरले भने उनले आफैले तीन महिनाकी छोरीको र आफ्नो जीउमा आगो लगाएर आत्महत्या प्रयास गरेको बताएका छन् ।
सन्जु देवीले जीउमा आगो लगाउनुभन्दा पहिले छोरीको घाँटीमा ब्लेडले काटेर घाउ बनाएको ससुरा लक्ष्मीप्रसाद साहले बताए ।
प्रहरीले घटनाको अनुसन्धानका लागि सन्जु देवीका ससुरा र देवरलाई नियन्त्रणमा लिएको छ । ‘आमाछोरीको जीउमा धारिलो हतियारले काट्ने र आगो लगाउने काम कसले गर्यो, त्यो अहिलेसम्म खुलिसकेको छैन’, प्रहरी नायब उपरीक्षक लिम्बूले भने, ‘ससुरा र देवरलाई नियन्त्रणमा लिएर अनुसन्धान भइरहेको छ ।
सन्जु देवीका पति सन्जय नेपाल प्रहरीका जवान हुन् । उनी अहिले काभ्रेमा कार्यरत छन् ।
प्रतिक्रिया दिनुहोस !
