ललितपुरः ललितपुर महानगरपालिका–१५ ढोलाहिटीमा बस्दै आएका नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ निवास अगाडीसम्म सडक कालोपत्रे भए पनि उनकाे निवास पछाडी भने सडकको हालत निकै खराब छ ।
आइतबार बिहान सबेरै खोटाङको दिक्तेल जान भनेर हिडेका मणीकुमार रार्इको स्कोरपियो गाडी हिलोमा फसेपछि उनी अलपत्र परे । करीब चार घण्टापछि क्रेन ल्याएर तानी उनको गाडी निकालियो । गाडी फसेको ठाउँ प्रचण्ड निवासभन्दा करीब ७० मिटरको दूरीमा पर्छ ।
हिलोमा फसेको राईको गाडी स्थानीयहरुसमेत मिलेर डोरी लगाएर तान्दा पनि निकाल्न सकिएन । गाडी निकाल्ने सबै प्रयास असफल भएपछि क्रेन झिकाएको मणीकुमार राईले बताए ।
यस सडकमा दिनहुजसो कुनै न कुनै सवारी फस्ने गरेको स्थानीय राम केसी बताउछन् । केसी भन्छन–‘हिजो मात्रै तीनवटा गाडी फसेका थिए, फराकिलो बनाउने नाममा खनिएका र माटोले पुरेका कारण हिनहुँ गाडीहरु फस्दै आएकाछन्।’
सडक बिग्रिएपछि यसक्षेत्रमा एम्बुलेन्स, विद्यालयका बस आवत–जावत गर्न सकेका छैनन । खाद्यान्न ढुवानी गर्ने सवारी साधनसमेत आउन नसकेको स्थानीयको गुनासो छ । दुई पाङ्ग्रे सवारी साधन पनि यहाँ चल्न सक्ने अवस्था छैन ।
आवत–जावतका लागि यस सडकको विकल्प नभएका कारण स्थानीयहरु निकै पीडित बनेका छन् । उनीहरु सरोकारवाला निकायप्रति आक्रोश पोखिरहेकाछन् ।
यस वडाका अध्यक्ष सुरेश महर्जनले सडकको दुईतिर रिटेनिङ वाल लगाउँदा बजेट सकिएकाले हाललार्इ ग्राभेल गर्न नसकिएको जनकारी दिए । वडा अध्यक्षले गैरजिम्मेवार अभिव्यक्ति दिएको भन्दै स्थानीयहरु असहत छन् ।
यसै क्षेत्रमा बसोबास गर्दै आएका प्रदेश सांसद राजकाजी महर्जनले आफनो क्षेत्रमा ढल व्यवस्थापनका लागि बजेट छुट्याएको र सडक पनि बिस्तारै बन्ने आश्वासन दिएका छन् ।
प्रतिक्रिया दिनुहोस !
