ओखलढुंगा : सिद्धिचरण राजमार्गअन्तर्गत हर्कपुर–ओखलढुंगा खण्डको कालोपत्रे एक वर्ष नबित्दै उप्किएको छ । कमसल सामग्री प्रयोग गरी बनाएका कारण कालोपत्रे आधा उप्किइसकेको स्थानीयले बताएका छन् ।
निर्माण कम्पनीले टालटुल गरेर सडक विभागलाई यो खण्ड हस्तान्तरण गरेको थियो । ४२ किलोमिटर सडकखण्डमा अधिकांश भागको कालोपत्रे उप्किएको छ । केत्तुके आसपास कालोपत्रे अत्यधिक उप्किएको छ । तामाङ कन्स्ट्रक्सनले कालोपत्रे गरेको बालेथामबाट लगलगे जंगलसम्मको १० किलोमिटर सडक जीर्ण बनेको छ । सडक भत्किएका कारण यो क्षेत्रमा प्राथमिकताका साथ मर्मत गर्नुपरेको हर्कपुर–ओखलढुंगा सडक आयोजनाका इन्जिनियर विश्वशरण तिमिल्सिनाले बताए ।
विभागले एक वर्षअघि टालटुल पारिएको सडक निर्माण कम्पनीबाट बुझेको थियो । स्थानीयले विरोध गरे पनि ठेकेदार कम्पनी र आयोजनाको मिलेमतोमा भत्किएकै अवस्थामा टालटुल गरेर सडक हस्तान्तरण गरेको जनाइएको छ । यो सडकको अन्य खण्डमा पनि कालोपत्रे उप्किन थालेपछि सडक आयोजना टालटुल गर्न थालिएको छ ।
४२ किलोमिटरमा कालोपत्रेका लागि प्रत्येक १०–१० किलोमिटरको टुक्रा बनाएर ठेक्का लगाइएको थियो । हर्कपुर–ओखलढुंगा खण्डमा चारवटा कम्पनीले ठेक्का पाएका थिए । कालिका रमण जेभी, टुँडी कन्स्ट्रक्सन, तामाङ कन्स्ट्रक्सन र तुँदी नागार्जुन जेभीले हर्कपुर–ओखलढुंगाको सडक कालोपत्रे गरेका हुन् । यसमध्ये तामाङ कन्स्ट्रक्सनले गरेको कालोपत्रे सबैभन्दा बढी उप्किएको जनाइएको छ । एक किलोमिटरबराबर १ करोड लागतमा सडक कालोपत्रेको ठेक्का लागेको थियो । एडीबीको ६० प्रतिशत सहयोग र सरकारको ४० प्रतिशत लगानीमा कालोपत्रे गरिएको थियो । १० वर्ष आयु रहेको भनिएको कालोपत्रे एक वर्ष नबित्दै भत्किए पनि सरोकारवाला सरकारी कार्यालयले चासो दिएका छैनन् ।
प्रतिक्रिया दिनुहोस !
