खाँदबारी : अरुण तेस्रो परियोजनाको बाँध निर्माणस्थलमा पहिरो खस्दा बेपत्ता भएका चारजनाको ३९ घण्टापछि जीवितै उद्वार भएको छ । शुक्रबार राति करिब ८ः४० बजे पहिरो खस्दा बेपत्ता भएका दुई भारतीयसहित चारजनाको ३९ घण्टापछि जीवितै उद्वार गरिएको हो ।
बेपत्ता भएका कालिकोटका कामदार ३२ वर्षीय प्रदीप शाही, जुम्ला चन्द्रनगर नगरपालिका-१ का ४४ वर्षीय प्रेम परियार, भारत झारखण्डका अपरेटर ५५ वर्षीय बुधन मुण्डा र भारत विहारका पम्प सहयोगी ४५ वर्षीय नन्द किशोरको जीवितै उद्वार भएको हो ।
मकालु ५ मा रहेको बाँध निर्माण स्थलमा हाल सुरुङ मार्गसहित अन्य आयोजनाको निर्माण कार्य सञ्चालन भइरहेको थियो।
पहिरो नरोकिँदा र वर्षा पनि भइरहँदा उद्धारमा समस्या देखिएको थियो । सुरुङमार्ग निर्माण भइरहेको स्थानमा माथिबाट पहिरो खसेको थियो। शनिबार दिनभरि ४ वटा स्काभेटरले पहिरो पन्छाए पनि फसेकालाई निकाल्न सकिएको थिएन । लामाे समयकाे प्रयासपछि आइतबार बिहान साढे ११ बजे उनीहरुको उद्वार भएकाे हो ।
प्रतिक्रिया दिनुहोस !
