वीरेन्द्रनगरमा अन्नपूर्ण ब्याडमिन्टन छनोट प्रतियोगिता सुरु

वीरेन्द्रनगरः कर्णाली प्रदेशको राजधानी वीरेन्द्रनगरमा अन्नपूर्ण पोस्ट अन्तर्राष्ट्रिय कर्पोरेट ब्याडमिन्टन छनोट प्रतियोगिता सुरु भएको छ । अन्नपूर्ण मिडिया नेटवर्कको आयोजनामा आइतबारदेखि प्रतियोगिता सुरु भएको हो । पत्रकारितालाई बहुआयामिक बनाउँदै स्वस्थ नागरिक उत्पादन गर्ने र खेलक्षेत्रका प्रतिभालाई जागरुक बनाउने उद्देश्यका प्रतियोगिता आयोजना गरिएको हो।

तीन दिनसम्म हुने प्रतियोगिताको कर्णाली प्रदेशका सामाजिक विकास मन्त्री दल रावलले उद्घाटन गरेका थिए । उनले अनुशासित र स्वस्थ समाज निर्माणका लागि खेलकुद आवश्यक रहेको उल्लेख गरे । ‘नागरिकलाई कुशल, स्वस्थ्य र अनुशाषित राख्न खेलकुद अपरिहार्य छ,’ उनले भने, ‘खेलकुदले मनोरञ्जन मात्रै होइन, देशको अर्थ विकासमा समेत महत्वपूर्ण भूमिका निर्वाह गर्दछ, त्यसैले खेलकुदलाई विकास गर्न हामी सबैको भूमिका आवश्यक छ ।’ 

खेलाडीको स्तरियता र भौतिक पूर्वाधार निर्माणमा सबैभन्दा पछि परेको कर्णाली प्रदेशको खेल विकासका लागि प्रदेश सरकारले प्राथमिकतामा राखेको मन्त्री रावलको भनाइ थियो।     उनले प्रदेश स्तरीय रंगशाला निर्माणको प्रक्रिया अगाडि बढिसकेको बताए । ‘पछिल्लो समय सबैमाँझ ब्याडमिन्टन खेल प्रचलित हुँदै आएको छ, पोहोर साल खेलाडीहरुले नै संरचना निर्माणका लागि महायज्ञ लगाउनुभएको रहेछ । हामी यसलाई निकै सराहना गर्दछौं र बहुउद्देश्यीय कवर्ड हल निर्माणका लागि सरकारी तर्फबाट पनि प्रयास गर्दछु,’ उनले भने । समय बिताउनका लागि मात्रै खेलिने गरिएको खेललाई अन्नपूर्ण पोष्टले प्रतियोगितामा सहभागी हुने अवसर दिलाएकोमा उनले धन्यवाद दिए ।

साथै आगामी दिनमा पनि मिडिया हाउसले खेलक्षेत्रलाई प्राथमिकतामा राख्ने विश्वास समेत व्यक्त गरे। प्रतियोगितामा सात जिल्लाका एकसय २८ जना खेलाडीहरुको सहभागिता रहेको छ । दैलेख, सुर्खेत, जाजरकोट, जुम्ला, रुकुम, सल्यान र हुम्लाका खेलाडीहरु छनोट प्रतियोगितामा सहभागीता जनाएका छन् ।

अन्नपूर्ण पोष्टका मध्य तथा सूदुरपश्चिमाञ्चल क्षेत्रीय प्रमुख प्रेम केसीले मिडिया हाउसले समाचार उत्पादन मात्रै नभई प्राथमिकतामा परेका विषयको भौतिक रुपमा नै विकास गर्न प्रतियोगिता आयोजना गरेको जानकारी दिए ।
विगत तीन वर्षदेखि सञ्चालन हुँदै आएको प्रतियोगिता आगामी दिनमा झन् उत्कृष्ट बनाउँदै लैजाने केसीले बताए । पुरुष युगल ३९ र एकल २२ वटा खेल हुनेछन् ।  यस्तै, मिस्क युगल चारवटा, १९ वर्ष मुनिका पुरुष १२ वटा, केटी चार वटा र महिला एकल चारवटा खेल हुनेछन् । प्रदेश स्तरबाट छानिएका खेलाडीले राष्ट्रिय प्रतियोगितामा भाग लिन पाउने छन् ।