वीरेन्द्रनगर : अन्नपूर्ण पोस्ट् अन्तर्राष्ट्रिय कर्पोरेट ब्याडमिन्टन प्रतियोगिताअन्तर्गत कर्णाली प्रदेशस्तरीय छनोट खेल आइतबारबाट वीरेन्द्रनगरमा सुरु भएको छ ।प्रतियोगिताको पुरुष एकलमा दैलेखका दीपेन्द्र श्रेष्ठ र खगेन्द्रबहादुर सिंहले विजयी सुरुवात गरेका छन् । यसैगरी जाजरकोटका महेन्द्र भदेल, रुकुमका शशिराम रावत, सुर्खेतका खगेन्द्र खत्री र नरेन्द्र बम ठकुरीले पनि आ-आफ्ना प्रतिद्वन्द्वीलाई पराजित गर्दै अघिल्लो चरणमा पुगेका छन् ।
यसैगरी यू-१९ महिला एकलको प्रतिस्पर्धामा सुर्खेतकी सामना भट्टराई र अग्रिमा भण्डारीले जित हात पार्दै अघिल्लो चरणमा स्थान बनाएका छन् ।
पुरुष युगलमा सुर्खेतका टक्कबहादुर शाही र महेशविक्रम सिंहको जोडीले जित हात पारे । आइतबार भएका अधिकांश खेलमा सुर्खेतका खेलाडीको दबदबा कायम राखे । पुरुष युगलमा सुर्खेतकै रवीन्द्र लामिछाने र नाराणय अधिकारी, रुकुमका शशिराम रावत र हरि चन्द, जाजरकोटका डम्मर विष्ट र प्रकाश सिंहको जोडीले पनि जित हात पारे । यसैगरी सुर्खेतका नगेन्द्र थापा र खगेन्द्र खत्री, बलबहादुर हुचिङमगर र रुपसिंह विक, जुम्लाका रोशन श्रेष्ठ र यादव श्रेष्ठ, दैलेखका ललित मल्ल र अर्जुन श्रेष्ठले जित हात पार्दै अघिल्लो चरणमा स्थान बनाए ।
तीन दिनसम्म सञ्चालन हुने प्रतियोगिताको कर्णाली प्रदेशका सामाजिक विकास मन्त्री दल रावलले उद्घाटन गरे । उनले अनुशासित र स्वस्थ समाज निर्माणका लागि खेलकुद अत्यावश्यक रहेको बताए ।
प्रतियोगितामा दैलेख, सुर्खेत, जाजरकोट, जुम्ला, रुकुम, सल्यान र हुम्लाका एक सय २८ खेलाडीको सहभागिता छ । पुरुष युगलमा ३९, पुरुष एकलमा २२, मिक्स डबल्समा चार, यू-१९ पुरुषमा १२ र यू-१९ महिलामा चारवटा खेल हुनेछन् । प्रदेश स्तरबाट छानिएका खेलाडी काठमाडौंमा हुने राष्ट्रिय प्रतियोगितामा सहभागी हुन पाउनेछन् ।
प्रतिक्रिया दिनुहोस !
