नेता प्रकाशमान सिंह भन्छन् : देउवाका आसेपासेका कारण कांग्रेस लथालिङ्ग
चितवन : नेपाली कांग्रेसका नेता प्रकाशमान सिंहले सभापति शेरबहादुर देउवा नेतृत्वको कडा आलोचना गरेका छन् । चितवनमा सोमबार भएको प्रजातान्त्रिक प्राध्यापक संघ प्रदेश ३ को भेलामा बोल्दै सिंहले देउवाको आलोचना गर्दै भने, ‘एकताको नाटक गरेर आफ्नो गुट घुसाउने अनि एकताको नारा लगाउने ?’
उनले पार्टीमा सही काम गर्ने र खुरापाती गर्ने एउटै मुल्याङ्कन भएको आरोप लगाए । नेता सिंहले नेतृत्वको कारण कांग्रेसले जनताको भावना अनुसारको काम गर्न नसकेको बताए । उनले पार्टी संस्थागन हुन नसकेको बताउँदै पार्टीलाई एकजुट भएर लाने मन भएपछि नेतृत्वले सीमा नाघेको भन्दै आपत्ति जनाएका छन् ।
‘एकजुट भएर जान कस्को पो चाहाना छैन र तर हरेका कुराको सीमा हुन्छ, सीमा नाघेपछि मैले बोल्न थालेको हुँ ,’उनले भने,‘ पावर पोलिटिक्स घुसाउने काम पार्टीमा भयो।’ नेता सिंहले पार्टी सभापतिका आसेपासेले गर्दा कांग्रेस लथालिङ्ग भएको आरोप लगाए ।
उनले पार्टी लथालिङ्ग भएको अवस्थामा कम्युनिस्टविरुद्ध लड्न गहे भइरहेको जिकिर गरे । ‘सभापतिका आसेपासेले गर्दा कांग्रेस लथालिङ्ग छ यही अवस्थामा कम्युनिस्टविरुद्ध लड्न सकिन्न’, नेता सिंहले भने ।