सांसद रेग्मीले दिए समितिको सदस्यबाट राजीनामा
सुर्खेतः कर्णाली प्रदेशमा संसदको कार्यव्यवस्था परामर्श समितिमा चर्को विवाद उत्पन्न भएको छ । बिहीबार सभामुख राजबहादुर शाहीको अध्यक्षतामा बसेको समितिको बैठकमा चर्काचर्की नै भएको हो । बैठकमा सभामुखसँग विवाद भएपछि सांसद धर्मराज रेग्मीले समितिको सदस्यबाट राजीनामा नै दिएका छन् ।
प्रदेश संसदको विहीवार बस्ने बैठकका लागि कार्यसूची तय गर्न कार्यव्यवस्था परामर्श समितिको बैठक डाकिएको थियो । समितिको उक्त बैठकमा सभामुख शाहीले संसदीय मामिला पत्रकार समाज र रेडियो कार्यक्रम उत्पादनका लागि बजेट उपलब्ध गराउने प्रस्ताव गरेका थिए ।
यस्तै संसद बैठक केहीदिन स्थगित गरेर असार १५ गतेको साटो १३ गते नै बोलाउने प्रस्ताव सभामुखले समितिको बैठकमा राखेका थिए । यही विषयमा समितिको बैठकमा विवाद भएको हो । पछिल्ला दिनमा सभामुख फरक शैलीमा प्रस्तुत हुन थालेको र बिहीबारको समितिको बैठकमा पनि अशोभनीय तरिकाले प्रस्तुत भएपछि आफूले सदस्यबाट राजीनामा दिएको रेग्मीले बताए ।
सभामुखसँग बैठकमा विवाद भएपछि रेग्मीले बिहीबार नै लिखित रुपमा आफ्नो राजीनामा पत्र सभामुखलाई बुझाएका छन् । संसदलाई मर्यादित बनाउन र बैठकलाई प्रभावकारी बनाउनका लागि दिइएका सुझावको कुनै सुनुवाइ नभएपछि आफूले समितिबाट राजीनामा दिएको रेग्मीको भनाइ छ ।
रेग्मीले भने,‘केहीदिनदेखि सभामुखको व्यवहार फरक हुँदै गएको थियो, समितिको बैठकमा पनि उहाँको व्यवहार पटक्कै शोभनिय देखिएन । अध्यक्षसँग नै बैठकमा विवाद भएपछि, त्यस्तो समितिमा बसिरहन मैले उचित ठानिन ।’यस्तै बिहीबारको संसद बैठकमा पनि सरकारको बजेटका बारेमा छलफल गर्नुपर्ने अडान सांसद रेग्मीले राखेका थिए ।
तर सभामुख शाहीले बजेटभन्दा अन्य विधेयकलाई कार्यसूचीमा राख्नुपर्ने तर्क गरेका थिए । त्यसैगरी परामर्श समितिको बैठकमा केहीदिन संसद स्थगित गरेर असार १५ गते पुनः बैठक बोलाउनुपर्ने अधिकांश सदस्यको राय थियो । तर सभामुखले १३ गते नै बैठक बोलाउने प्रस्ताव गरेपछि विवाद उत्पन्न भएको थियो । विधि र प्रक्रिया भन्दा कचहरी शैलीमा समिति अगाडी बढेको आरोप सांसद रेग्मीको छ ।
प्रतिक्रिया दिनुहोस !
