धरान: आगलागीबाट घर गुमाएका सुनसरीको बराहनगरपालिका–११ स्थित मधुवनका आगलागी पीडितहरुलाई सिलिण्डरसहितको ग्यास चुल्हो वितरण गरिएको छ । मधुवन–प्रकाशपुर सरोकार समाजको अगुवाइमा इनरुवामा संकलित राहत रकमबाट पीडितहरुलाई सिलिण्डरसहित ग्यास चुल्हो वितरण गरिएको हो ।
समाजका सदस्य दिनेशकुमार लमसालको पहलमा पीडित ३६ घर परिवारलाई सिलिण्डरसहितको ग्यास चुल्हो वितरण गरिएको हो । आगलागीमा परेर धनसम्पत्ति गुमाएका पीडितहरु घटनापछि दाउराले खाना पकाउँदै आएका थिए ।
आगलागी पीडितहरुलाई सानो राहत दिने उद्देश्यले रकम संकलन गरी सिलिण्डरसहितको ग्यास चुल्हो वितरण गरिएको समाजका लमसालले बताए । समाजले पीडित परिवारलाई ग्यास चुल्हो वितरण गरेपछि पीडित परिवारले ग्यासबाट खाना पकाउन थालेको पीडित किसुनदेव सरदारले बताए ।
उनले आगलागीपछि नगरपालिकाबाट ५ हजार नगद भन्दा अन्य राहत नपाएको गुणासो गरेका छन् । मधुवनमा गत चैत ३ गते स्थानीय पुरन चौधरीको घरमा विद्युत् सट हुँदा ३६ घर जलेर नष्ट भएका थिए । आगलागीमा १८ चौपायाको मृत्यु भएको थियो ।
प्रतिक्रिया दिनुहोस !
