जुम्ला : कर्णालीको 'हिमचितुवा'को रुपमा प्रख्यात विश्व किर्तिमानी एथलेटिक्स धावक हरिबहादुर रोकाया गम्भीर विरामी परेका छन् । हाल न्यूरो अस्पताल बाँसबारीको आइसीयूमा राखेर उनको उपचार भइरहेको छ । एक्कासी शरीर नचल्दा धावक रोकाया हिडडुल गर्न नसक्ने अवस्थामा छन् ।
गत शनिबारदेखि उनको हातखुट्टा चल्न छाडेको छ । कर्णाली स्पोर्ट क्लब जुम्लाका अध्यक्ष सरोज शाहीका अनुसार शरीर नचल्दा धावक रोकायालाई समस्या भएपछि कर्णाली स्वास्थ्य विज्ञान प्रतिष्ठान शिक्षण अस्पताल जुम्लाबाट काठमाडाैं पठाइएको जानकारी दिए ।
प्रतिष्ठानका डा. नविन थापाले रोकायको खानपानको सन्तुलन नमिल्दा रोगसँग लड्न सक्ने क्षमता कमजोर भएपछि स्नायु प्रर्णालीमा समस्या आएको बताए । उनले भने,‘निमोनिया, डायरीया भएको खण्डमा नसा हानेर समस्या हुन्छ । त्यो समस्या उनका देखिएको हो ।’
धावक रोकायाले जुम्लाको सिमाचौरमा दुई दर्जन बढी खेलाडीलाई एथलेटिक्स प्रशिक्षण दिदै आएका थिए । उनले उत्पादन गरेका आधा दर्जन बढी धावकले राष्ट्रिय तथा अन्तराष्ट्रियस्तरका खेलमा भाग लिइसकेका छन् ।
उनले खेलाडीलाई प्रशिक्षण दिनका लागि हिमपात, घामपानी नभनेरै निरन्तर लागिपरेका छन ।
प्रतिक्रिया दिनुहोस !
