इटहरी : सशस्त्र प्रहरीका एक इन्स्पेक्टर सुनसरीको कोसी गाउँपालिकाबाट पक्राउ परेका छन् । प्रहरीको जाँच छलेर अघि बढेको भारतीय कारलाई नियन्त्रणमा लिने क्रममा एक तस्करसहित इन्स्पेक्टर सुमन रानाभाटलाई प्रहरीले नियन्त्रणमा लिएको हो ।
कोसी गाउँपालिका-८ हरिपुरका ३० वर्षीय चन्दन यादवसँगै रानाभाटलाई पक्राउ गरिएको प्रहरीले जनाएको छ । नेपाल-भारत सीमामा सेटिङ मिलाएर यादव लामो समयदेखि तस्करीमा सक्रिय रहँदै आएको जनाइएको छ । यादवसँग सशस्त्रका चार जवान पनि एउटै गाडीमा सवार थिए ।
श्रीपुरमा खटिएको प्रहरी टोलीले बीआर ३८ पी १९४८ नम्बरको कार रोक्न खोज्दा नरोकिई भागेको थियो । प्रहरीलाई पेलेर भागेको कारलाई नियन्त्रणमा लिन जिल्ला प्रहरी कार्यालय सुनसरीबाट डीएसपी नारायण चिमरिया नेतृत्वको टोलीसमेत खटिएको थियो ।
यादवलाई कारसहित कोसी गाउँपालिका-६ कटानबाट नियन्त्रणमा लिइएको डीएसपी चिमरियाले बताए । सुरक्षाकर्मी पक्राउ परेका विषयमा भने प्रहरीले केही खुलाएको छैन । स्रोतले भने तस्करलाई सुरक्षा दिइरहेका सशस्त्रले मादक पदार्थसमेत सेवन गरेको पाइएको जनाएको छ । सशस्त्र प्रहरीले हातहतियारसमेत बोकेको जनाइएको छ । पक्राउ परेका सुरक्षाकर्मीलाई आन्तरिक कारबाही गर्ने भन्दै सशस्त्रले जिम्मा लिएर गएको थियो ।
सशस्त्र प्रहरीले भने पक्राउ परेका इन्स्पेक्टरको बचाउ गरेको छ । सशस्त्र प्रहरी बल मुख्यालय पकलीका डीआईजी मन्दिप श्रेष्ठका अनुसार इन्स्पेक्टर रानाभाट भर्खरै कोसी गाउँपालिका आएका हुन् । उनले आएदेखि नै सशक्त रुपमा तस्करीका सामान बरामद गरिरहेका थिए । ‘कसैलाई अप्ठेरो भएपछि उसलाई यस्तो आरोप लगाएको हुन सक्छ’, उनले भने, ‘उसमाथिको आरोप निराधार हो ।’
केही समयअघि मात्र सशस्त्रका अधिकारी संखुवासभाबाट काठ तस्करी आरोपमा धनकुटामा समातिएका थिए । एक महिनायता सशस्त्र प्रहरीका अधिकारी समातिएको यो दोस्रो घटना हो ।
यादवले यसअघि पनि संगठित रूपमा तस्करी गरिरहेको प्रहरी अनुसन्धानबाट खुलेको छ । कोसी गाउँपालिकाबाटै गत वैशाख २५ गते ३ हजार ५१० किलो चिनियाँ स्याउ बरामदको घटनामा पनि यादव जोडिएको जनाइएको छ । पानीट्यांकी पूर्व-दक्षिणतर्फको यादव टोलबाट भारतीय ट्रकमा हालेर भारततर्फ लैजाँदै गरेको स्याउ प्रहरीले नियन्त्रणमा लिएको थियो । बीआर ५० जी ४०१६ नम्बरको उक्त ट्रकसँगै चालक भारत सुपौलका ३३ वर्षीय पवन यादवसमेत पक्राउ परेका थिए । १९ लाखभन्दा बढीको उक्त सामान र ट्रक प्रहरीले भन्सारमा पठाएको थियो । उक्त सामान चन्दन यादवकै भएको खुलेको थियो ।
भारतसँगको सीमावर्ती नेपाली क्षेत्रमा सुरक्षाका लागि सशस्त्र खटिएका छन् । सुनसरीको सीमावर्ती क्षेत्रमा भारतीय तस्करलाई सशस्त्र प्रहरीले नै सुरक्षा दिने गरेको र तस्करको सवारी साधन चढी हतियारसहित डुल्ने गरेको स्थानीयवासी बताउँछन् ।
प्रतिक्रिया दिनुहोस !
