धनगढीः सत्तापक्षकै प्रदेश सभा सदस्यहरुले बजेटको विरोध गरिरहेका बेलाप्रदेश नम्बर ७माविपक्षले संसद बैठक अवरुद्ध गरेका छन् । प्रदेश सरकारले ल्याएको बजेट जनतामुखी नभएको र कार्यकर्ता पोस्ने बजेट भएको भन्दै प्रतिपक्षी दल नेपाली कांग्रेस र राष्ट्रिय जनता पार्टीले संसद बैठक अवरुद्ध गरेका हुन् ।
असार १ गते प्रदेश सरकारले २५ अर्ब ६ करोडको बजेट प्रदेश सभामा प्रस्तुत गरेको थियो । सोमबार अपरान्ह ४ बजेदेखि सुरु बजेटमाथिको छलफलमा सभामुख अर्जुनबहादुर थापाले बैठकको कार्य प्रारम्भ भएको सूचीत गर्ने वित्तिकै प्रतिपक्षी सांसदहरुले उठेर बजेटमाथिको छलफलको विरोध गरेका थिए ।
सभामुख थापाले केहीआपत्ति भए एकजना सदस्यले आफ्नो कुरा राख्न निर्देशन गरेपछि कांग्रेस संसदीय दलका नेता डा. रणबहादुर रावलले सरकारले ल्याएको बजेट डल्लो बजेट भएको र त्यसले कार्यकर्ता पोस्ने भएकाले संशोधनको माग गरे ।
‘सरकारले जेठमा ल्याएको एक अर्ब ५ करोडको अल्पकालिन बजेटको पहिलो भएकाले समर्थन गर्यौं, तर त्यसको चरम दुरुपयोग भएको छ’, उनले भने, ‘अहिले पनि अल्पकालिन जस्तै डल्लो बजेट आएको छ । त्यो सीधै कार्यकर्ता पोस्न हो, त्यसैले त्यो बजेट संशोधन भएर आउनुपर्छ ।’ उनले बजेट संशोधनन भए प्रतिपक्षको दायित्व निर्वाह गर्ने बताए ।
उनले शीर्षकबिनाको बजेट पास भएपछि त्यसको चरम दुरुपयोग हुनसक्ने बताए । ‘प्रदेशका गौरवका योजनाका लागि डीपीआर छैन भनेर डल्लो बजेट विनियोजन भएको छ, पर्यटनका लागि अर्बौँ बजेट विनियोजन गरिएको छ, प्रतिपक्षलाई छलफलमा बोलाएर थपिएका योजना र गरिएको प्रतिवद्धता पनि पुरा भएका छैनन्’, बजेटप्रति टिप्पणी गर्दै उनले आरोप लगाए ।
विपक्षी सांसदको तर्फबाट डाक्टर रावलले संसदमा सम्बोधन गरेर पनिउनीहरुले आफ्नो सीटमा नबसेपछि दुई पटकसम्म सभामुख थापाले बस्न निर्देशन गरेका थिए । तर प्रतिपक्षीदलका सांसद सदनमा उभिइराखेपछि बैठक स्थगित गरियो । संसदको अर्को बैठक मंगलबार अपरान्ह ४ बजेसम्मका लागि स्थगित गरिएको छ ।
प्रतिक्रिया दिनुहोस !
